Жетісу облысында полиция қызметкерлері ер адамды қауіпті жағдайдан аман алып қалды, – деп хабарлайды 7-su.kz ақпараттық порталы Polisia.kz-ке сілтеме жасап.
11 ақпан күні сағат 17:30 шамасында «102» арнасына шұғыл хабарлама түсті. Қаланың 36 жастағы тұрғыны масаң күйде бесінші қабаттағы балконға шығып, өзіне қауіп төндірмек болған.
Оқиға орнына жеткен участкелік инспекторлар Мади Болатбек пен Мақсат Сейітберлі байыппен әрі сенімді әрекет етті. Тактикалық шеберліктерін қолданып, олар азаматпен байланыс орнатып, қауіпті жағдайдан аман алып шықты.
Құтқару операциясының нәтижесінде ер адам қауіпсіз жерге шығарылды. Кейін оның алкогольдік масаң күйде болғаны анықталды. Жағдай тұрақталған соң азамат медициналық айықтырғышқа жеткізіліп, қажетті психологиялық көмек көрсетілді. Қазіргі уақытта оның өмірі мен денсаулығына қауіп жоқ, азамат мамандардың бақылауында.
