Талдықорғанда «Жол Активтерінің ұлттық сапа орталығы» РМК бас директорының кубогіне арналған республикалық үстел теннисі турнирі өтті. Жарысқа еліміздің әр аймағынан 120 қызметкер қатысып, жұптық және жекелей ойындарда өзара сынға түсті, – деп хабарлайды 7-su.kz ақпараттық порталы.
Командалық есепте бірінші орынды орталық аппаратының қызметкерлері иеленсе, екінші және үшінші орындарға Қостанай және Алматы облыстарының спортшылары көтерілді. Жекелеген сында Қостанай облыстық филиалының қызметкері Мақсат Әлімбаев жеңімпаз атанды. Екінші орынды Шымкент қаласындағы зертхана меңгерушісі Ермек Намазов, үшінші орынды Маңғыстау облысынан келген Ерболат Шаймұрат еншіледі. Қыздар арасында орталық аппаратының Диляра Қонаева, Жұлдыз Алпыспаева және Камила Бекенова жеңімпаз атанды.
Сонымен қатар, бірнеше аталым бойынша үздік ойын үлгісін көрсеткен қатысушылар да марапатқа ие болды.
«Бесінші жыл қатарынан ұйымдастырылып отырған турнир қызметкерлер арасындағы ынтымақ пен бірлікті нығайтып, салауатты өмір салтын насихаттауға арналған,» – дейді РМК облыстық филиалының директоры Елдар Әбенов. Ол былтыр Павлодардағы жарысқа 90 адам қатысқан болса, биыл Талдықорғандағы турнирге 120 адам келгенін атап өтіп, спортқа қызығушылықтың артқанын жеткізді.
Жоғары жылдамдықты, психологиялық төзімділікті дамытатын үстел теннисі «Жол Активтерінің ұлттық сапа орталығы» РМК-ның 20 филиалында еңбек ететін қызметкерлердің қарым-қатынасын нығайтуға үлкен үлес қосып отыр.
