Шымкент қаласының әкімдігі «Ордабасы» футбол клубының жеке меншік басқаруға өтетінін ресми түрде мәлімдеді. Аталмыш қадам қазақстандық кәсіби спортты коммерцияландыру және бюджетке толық тәуелділіктен арылту бағытындағы маңызды стратегиялық шешім болды, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
Шымкент қаласының әкімі Ғабит Сыздықбеков пен «Integra Construction KZ» ЖШС басшылығы клубты жекешелендіру туралы меморандумға қол қойды. Клубтың жаңа басқарушысы – қазақстандық белгілі кәсіпкер, «Integra Construction KZ» компаниясының бенефициарлық иесі Шахмұрат Мұтәліп. Айта кетейік, кәсіпкер жақында ғана «Eurasian Resources Group» (ERG) халықаралық компаниясының 40 пайыздық үлесін иеленіп, отандық ірі бизнес өкілдерінің біріне айналған болатын. Сонымен қатар ол Қазақстан бокс федерациясын басқарады және «Атамекен» ұлттық кәсіпкерлер палатасында маңызды комитетке жетекшілік етеді.
Құжат клубқа ауқымды жеке инвестиция тартуды, тұрақты нарықтық басқару үлгісіне көшуді және корпоративтік басқарудың заманауи халықаралық стандарттарын енгізуді көздейді. Жаңа басқару жүйесі аясында материалдық-техникалық базаны жаңарту, жаттығу инфрақұрылымын дамыту, басқару процестерін толық цифрландыру және клубтың коммерциялық тиімділігін арттыру бағытындағы жұмыстар атқарылады. Ғабит Сыздықбеков бұл қадам Шымкенттің еліміздегі жетекші футбол орталықтарының бірі ретіндегі позициясын нығайтатынын атап өтіп, клубтың ұлттық және халықаралық деңгейде бәсекеге қабілеттілігі артатынына сенім білдірді.
Инвестор Шахмұрат Мұтәліп өз кезегінде «Ордабасыны» дамытуды ұзақ мерзімді әлеуметтік маңызы бар жоба ретінде қарастыратынын жеткізді. Оның айтуынша, басты міндет – клубтың бай тарихын сақтай отырып, инфрақұрылымға, жас ойыншыларды даярлауға және мықты команда қалыптастыруға басымдық беру. Бұл үрдіс отандық футболдың мемлекеттік қаржыға ғана иек артпай, жеке капитал есебінен кәсіби деңгейге көтерілуіне жол ашады. Жеке инвестордың келуімен «Ордабасы» өз жанкүйерлерін жаңа жеңістермен қуантып, еурокубоктарда тұрақты өнер көрсететін заманауи топ-клубқа айналады деп күтіледі.
