Кемел келешектің кепілі болатын Ата Заңымыздың жаңа жобасы жасалып, республикалық референдумда халық қолдаса қабылданбақ. Бұл – еліміздің саяси дамуының жаңа кезеңіне өтетін тарихи сәт. Осыған орай «Жастар» спорт сарайында «START: Жетісу жастары – таңдау уақыты!» атты референдумды қолдауға бағытталған шара өтті. Оған аймақтағы белсенді жастар мен халық қалаулылары қатысты.
Жиынның ашылу салтанатында ҚР Парламенті мәжілісінің депутаты Болат Керімбек:
– Ата Заңдағы өзгерістердің түпкі мәні – тәуелсіздігімізді нығайту, қорғау және жаңа буынға қуатты мемлекетті аманат ету. Алда үлкен таңдау тұр. Бұл жәй ғана дауыс беру емес, ел болашағын анықтайтын маңызды таңдау. Ұлттың болашағы сіздер, жастардың қолында, – деді.
Облыстық мәслихат төрағасы, Конституциялық реформа жөніндегі комиссияның мүшесі Гүлнар Тойлыбаева, ҚР Парламенті мәжілісінің депутаты Анас Баққожаев тарихи сәтте белсенділік танытқан жастарға ризашылық білдіріп, қазақстандықтарға алдағы референдумда, Жаңа Конституция жобасы бойынша өз ұстанымын білдіруге үндеу жасады.
Осыдан кейін аудандармен тікелей эфир арқылы байланыс орнатылып, әр өңірдің белсенді жастары тарихи шешімге қатысатындарын жеткізді. Шара барысында жастар флешмоб билеп, кеш қонақтары «Ozge band», «Nazar серілері», эстраданың жарық жұлдызы Баян Сұлу өнер көрсетті.
Жастар Конституциялық жобаның маңыздылығына тоқталып, ел болашағына әсер ететін тарихи шешімде қалыс қалмайтындарын айтып, ашық пікірлерін білдірді.
– Тәуелсіз еліміздің болашағы дегенде барлығымыз бір кісідей жұмылуымыз керек. Әр адам қабылдаған шешім біздің мемлекетіміздің одан әрі дамуына әсер етеді. Айбынды Ата Заңымызға енетін өзгерістер және толықтырулармен толыққанды таныспыз. «Референдумға бәріміз қатысайық» деген мұратпен жиналдық. Шараның мақсаты – жастар арасында саналы таңдау мәдениетін қалыптастыру, оларды қоғамдық өзгерістерге белсенді араласуға шақыру және ел дамуына жауапкершілікпен қарауды насихаттау, – деді Ақнұр Әділбай.
Белсенді жастардың бірі Айару Жетпісбай: «Бүгінгі бастама өңір жастарының басын қосып, олардың қоғамдық үдерістерге саналы әрі жауапкершілікпен қатысуына жол ашатын маңызды алаң болмақ. Ел, мемлекет болашағы жолында жасалып жатқан өзгеріске үнемі атсалысу – әр адамның борышы. Болашақ – жастардың қолында. Сондықтан біз, маңызды референдумға бейжай қарамай, бірауыздан қатысуымыз керек», – деді.
Ата Заң – мемлекетіміздің құқықтық, саяси және әлеуметтік дамуының стратегиялық бағытын айқындаған, халқымыздың бірлігі мен берекесінің, тәуелсіздігіміздің мызғымас кепілі. Осындай тарихи сәтте жастардың белсенділік танытқаны бізді қуантады. Айта кетейік, Конституцияның жаңа редакциясын қабылдау немесе қабылдамау туралы соңғы сөзді халық 15 наурыз күні республикалық референдумда айтады.
Айдар ҚАЛИЕВ
