Шығыс Қазақстан облысы әкімінің бірінші орынбасары Жақсылық Омарға қатысты соталды тергеу басталды. Бұл ақпаратты Ұлттық қауіпсіздік комитеті растады, – деп хабарлайды 7-su.kz ақпараттық порталы.
13 ақпанда әлеуметтік желілерде Жақсылық Омардың ұсталғаны туралы ақпарат тарады. Осыған байланысты өңірлік әкімдік мұндай мәліметті жоққа шығарды. Әкімдік өкілдері шенеуніктің денсаулығына байланысты уақытша демалыс алғанын мәлімдеген болатын.
Кейін Ұлттық қауіпсіздік комитеті Жақсылық Омарға қатысты соталды тергеу басталғанын растады.
«Соталды тергеу жүргізіліп жатыр. Қылмыстық-процестік кодекстің 201-бабы 1-бөлігіне сәйкес өзге ақпарат жария етілмейді», – деп хабарлады ведомство.
Қазіргі уақытта тергеу нақты қай бап бойынша жүргізіліп жатқаны нақтыланбады. ҰҚК бұл ақпаратты жария етпеді.
