Елорда әуежайында мемлекеттік сапармен келген Оман Сұлтандығының басшысы Хайсам бен Тариқ Әл Саидты Қазақстан Президенті Қасым-Жомарт Тоқаев арнайы қарсы алды. Мәртебелі мейманның бортын ел шекарасынан бастап әскери әуе күштерінің жойғыш ұшақтары қапталдаса ұшып, құрмет көрсетті. Астананың ұшу алаңында салтанатты түрде Құрмет қарауылы ротасы сап түзеді, – деп хабарлайды 7-su.kz ақпараттық порталы.
Екі ел басшылары әуежай залында өткен шағын сұхбат кезінде өзара байланыстарды тереңдету бағыттарын талқылады. Мемлекет басшысы Қасым-Жомарт Тоқаев бұл сапардың екіжақты қатынастарды дамытудағы тарихи маңызына тоқталды.
«Оман Сұлтандығы экономикасын ілгерілетуде зор табысқа жеткен, халықаралық аренада өте белсенді әрі конструктивті дәнекер мемлекет ретінде белгілі. Еліңіздің өз аймағында, одан тысқары жерлерде, соның ішінде Қазақстанда да беделі биік. Мемлекеттеріміз арасындағы серіктестіктің әлеуеті зор екеніне сенімдімін. Алдымызда ынтымақтастық аясын мейлінше кеңейту міндеті тұр», – деді президент. Өз кезегінде Оман сұлтан Хайсам бен Тариқ Әл Саид көрсетілген қонақжайлық үшін алғыс айтып, алдағы келіссөздердің жемісті болатынына сенім білдірді.
Сапар шеңберінде жоғары деңгейдегі маңызды келіссөздер жүргізіліп, бірқатар стратегиялық құжатқа қол қойылады. Сондай-ақ мемлекет басшылары қазақ-оман бизнес форумының жұмысына қатысып, инвестициялық және сауда-экономикалық әріптестіктің жаңа бағыттарын айқындайды. Аймақтар арасындағы байланысты арттырып, кәсіпкерлерге жаңа мүмкіндіктер ашуға бағытталған бұл бастамалар екі елдің өзара ықпалдастығын жаңа деңгейге көтермек.
