Мәжіліс депутаты Нартай Аралбайұлы Қазақстандағы дәстүрлі садақ ату спорты жаңа мәртебеге ие болғанын мәлімдеді. Енді Республикалық дәстүрлі садақ ату федерациясы ресми аккредитациядан өтіп, жеке спорт түрі ретінде дербес дамитын болды, – деп хабарлайды 7-su.kz ақпараттық порталы Qazaqtoday сайтына сілтеме жасап.
Бұл туралы Федерация президенті қызметін қоса атқаратын депутат әлеуметтік желідегі парақшасында жазды.
«Сүйінші, мергендер! Федерация аккредитация алды. Бұл – үлкен саяси маңызы бар шешім. Дәстүрлі садақ ату енді футбол, волейбол секілді жеке федерация ретінде дербес даму жолына түсті», – деді Нартай Аралбайұлы.
Оның айтуынша, жаңа мәртебе федерацияның тәуелсіз жұмыс істеуіне мүмкіндік береді. Енді ұйым өз құрылымын бекітіп, қызметкерлерді тағайындай алады, спортшыларға стипендия белгілеп, мемлекеттен тікелей қаржылық қолдау алу құқығына ие болады.
Сарапшылардың пікірінше, бұл шешім ұлттық спорт түрінің институционалдық тұрғыда нығаюына және жүйелі дамуына серпін беруі мүмкін.
Айта кетейік, 2019 жылы құрылған федерация бұған дейін Ұлттық спорт қауымдастығы арқылы аккредитацияланған болатын. Соған байланысты оның дербес қызметінде бірқатар шектеулер болған.
Депутат аталған жетістікті ортақ еңбектің нәтижесі деп бағалап, дәстүрлі садақ ату спортының өкілдері мен жанашырларын құттықтады.
