Жетісу облысында «Таза Қазақстан» экологиялық бағдарламасын іске асыру шеңберінде елді мекендердің инфрақұрылымын жақсарту бағытында ауқымды жұмыстар атқарылды. 2025 жылы өңірде балалар мен спорт алаңдарын салу және қолданыстағы нысандарды жаңғырту шаралары іске асты. Бағдарлама аясында облыс бойынша 81 жаңа нысан пайдалануға беріліп, жас ұрпақтың қауіпсіз ортада ойнауына, ал тұрғындардың бұқаралық спортпен айналысуына қолайлы жағдай жасалды.
Аталған нысандарды салу және жөндеу жұмыстарына бюджеттен 1,3 млрд теңге қаражат қарастырылды. Инвестиция аулалар мен қоғамдық кеңістіктердің сәулеттік келбетін жақсартып қана қоймай, салауатты өмір салтын насихаттауға серпін берді. Сонымен қатар, биыл қосымша 17 балалар мен спорт алаңын салу жоспарланған. Осы мақсатқа облыстық бюджеттен тағы 300 млн теңге бөлініп отыр.
Мұндай жобаларды жүзеге асыру балалардың қауіпсіздігін қамтамасыз етіп, ересектердің бос уақытын тиімді өткізуіне, отбасылық құндылықтардың нығаюына негіз болады. Абаттандырылған алаңдар тұрғындар жиі бас қосатын тартымды орынға айналып, тату көршілік қарым-қатынасты дамытуға және белсенді қоғам қалыптастыруға септігін тигізеді.
Жетісу облысының энергетика және тұрғын үй-коммуналдық шаруашылық басқармасының мәліметінше, тұрғындар үшін қолайлы әрі қауіпсіз орта қалыптастырып, елді мекендердің инфрақұрылымын жүйелі түрде дамыту жұмыстары алдағы уақытта да өз жалғасын табады.
«Жетісу-Ақпарат»
