2 наурыздағы сауда барысында мұнай бағасы күрт қымбаттады. Бұған 28 ақпанда басталған АҚШ пен Израильдің Иранға қарсы әскери операциясы және Ислам Республикасының жауап соққылары себеп болды, – деп хабарлайды 7-su.kz ақпараттық порталы РБК-ға сілтеме жасап.
Лондондағы ICE биржасында мамыр айындағы Brent маркалы мұнай фьючерстерінің бағасы 13,04 пайызға өсіп, баррелі 82,37 долларға жетті. Бұл – Астана уақыты бойынша таңғы сағат 4:00-дегі көрсеткіш. Мұнай бағасы бұған дейін 82 доллардан жоғары деңгейде 2025 жылғы 16 қаңтарда ғана тіркелген болатын.
Кейін нарықтағы өсім баяулап, баға 8,93 пайызға қымбаттады. Сауда барысында бір баррель мұнай 79,38 доллар деңгейінде бағаланды.
Айта кетейік, Ормуз бұғазы ресми түрде жабылған жоқ. Дегенмен үш танкерге соққы жасалғаны хабарланды. Осыған байланысты ірі мұнай компаниялары мен трейдерлер мұнай мен жанармай жөнелтуді уақытша тоқтатты. Нәтижесінде бұғаз арқылы өтетін теңіз трафигі 38–50 пайызға дейін төмендеген.
