Талдықорғанда «Қоғамдық келісім» КММ ұйымдастыруымен Қазақстан халқы Ассамблеясы жанынан құрылған Жетісу облыстық этномедиация кеңесінің кезекті отырысы өтті.
Аймақтағы әрбір аудандық, қалалық кеңестің төрағалары мен мүшелері қатысқан бұл басқосуда 2024 жылы медиация саласы бойынша атқарылған жұмыстар қорытындыланды. Сондай-ақ, жиында кеңес құрамын қайта бекіту, биылғы жылдың жоспарына сәйкес Қазақстан халқы Ассамблеясының 30 жылдығына орай ұйымдастырылатын іс-шаралар сынды бірқатар өзекті мәселелер талқыланды.
Ұйымдастырушылардың сөзінше, медиация институты елімізде 2015 жылдан бері жұмыс жасап келеді. Басты мақсаты – этносаралық қақтығыстардың алдын алу, береке-бірлікті бекемдеп, қоғамдық келісім мен жалпыұлттық бірлікті нығайту бағытында жұмыс жасайтын қоғамдық ұйымдардың қызметіне қолдау көрсету. Осыған байланысты өткен жылдың қорытындысы бойынша облыс орталығында 8 іс-шара өткізіліп, 450-ден астам адам қамтылған.
– Медиация – татулық тірегі. Бұл кез-келген дауды үшінші бір адамның араласуы арқылы оңтайлы жолмен реттеуді көздейді. Бүгінде Жетісу өңірінде 3 кәсіби, 100 қоғамдық медиатор жұмыс жасауда. Ал, облыстық этномедиация кеңесінің құрамында мемлекеттік қызметшілерді, мәслихат депутаттарын, ардагерлер және аналар бірлестігінің төрағаларын, БАҚ, дін және ауылшаруашылық саласының өкілдерін қамтыған 31 мүшесі бар. Олар аймақтағы татулықты дәріптеп, басқа да жұмыстардың атқарылуына өз үлестерін қосып келеді, – дейді жауаптылар.
Еске сала кетейік, 2024 жылғы 11 қазанда Астана қаласының Достық үйінде Қазақстан халқы Ассамблеясы Кеңесінің кеңейтілген отырысы өткен еді. Сол айтулы шарада ҚР Мәдениет және ақпарат вице-министрі Айзада Құрманова 2025 жылы ҚХА-ның 30 жылдығына жоспарланған іс-шаралар атаған болатын. Тарихи датаның 30 жылдығын мерекелеу аясында елімізде және шетелде кемінде 1,5 млн адамды қамти отырып, түрлі форматтағы 150-ден астам іс-шара ұйымдастыру жоспарланып отыр.
Айдын КӘЛІМХАН
