Миллиардер Шухрат Ибрагимов Қостанайдың «Тобыл» футбол клубының жаңа бас құрылтайшысы атанды, – деп хабарлайды 7-su.kz ақпараттық порталы.
Әкімдік таратқан мәліметке сәйкес, аталған шешім Президент Қасым-Жомарт Тоқаевтың қазақстандық футболды коммерцияландыру жөніндегі тапсырмасына сәйкес қабылданған.
Шухрат Ибрагимов – Eurasian Resources Group (ERG) директорлар кеңесінің төрағасы әрі бас атқарушы директоры. Ол кәсіпкер, «еуразиялық үштіктің» мүшесі болған Әлижан Ибрагимовтің ұлы. Бұл үштікке сондай-ақ кәсіпкерлер Патох Шодиев пен Александр Машкевич кірген.
Әлижан Ибрагимов 2021 жылы дүниеден өткен. Forbes Kazakhstan журналының 2024 жылғы деректеріне сәйкес, Ибрагимовтер отбасының байлығы 1,5 миллиард долларға бағаланған.
Айта кетейік, «Тобыл» футбол клубы өткен маусымда Қазақстан Премьер-лигасында қола жүлдеге ие болып, Қазақстан Кубогын жеңіп алған. Ал биыл клуб Қазақстан Суперкубогында «Қайрат» командасын жеңіп, тағы бір трофей иеленді.
