Қазақстанның Халық әртісі Димаш Құдайберген мен танымал актриса Самал Еслямова Халықаралық ТҮРКСОЙ ұйымының беделді марапаттарына ие болды. Салтанатты шара Астана қаласында өтті, – деп хабарлайды 7-su.kz ақпараттық порталы.
Димаш Құдайберген түркі әлемінің мәдениетін дамытуға қосқан зор үлесі үшін айрықша атап өтілді. Оған ТҮРКСОЙ ұйымының ең жоғары марапаты саналатын «Түркі әлемінің мәдениет елшісі» атаулы ордені табыс етілді. Айта кетерлік жайт, Димаш аталған орденмен марапатталған әлемдегі екінші тұлға. Бұған дейін бұл мәртебелі атақ түркиялық нобель сыйлығының лауреаты, профессор Әзиз Санжарға берілген болатын. Әнші өз кезегінде марапатты қабылдай отырып, мұны жеке жетістігі емес, бүкіл қазақ халқына көрсетілген құрмет және бауырлас елдер арасындағы дипломатиялық қатынастардың нығаю белгісі ретінде қабылдайтынын жеткізді.
Сонымен қатар Қазақстанның еңбек сіңірген қайраткері Самал Еслямова да ұйымның арнайы жүлдесіне ие болды. Оған түркі және әлемдік киноөнерін ілгерілетуге қосқан үлесі үшін «Түркі әлемінің үздік әртісі» номинациясы бойынша марапат берілді. ТҮРКСОЙ Бас хатшысы Сұлтан Раев:
«Димаш Құдайберген музыка арқылы мәдени елші миссиясын атқарса, Самал Еслямова қазақ киносының әлем мойындаған символына айналды. Мұндай марапаттар – олардың еңбегінің лайықты бағасы», – деп атап өтті.
ҚР Мәдениет және ақпарат министрлігі аталған жетістіктердің түркі әлемінің мәдени байланыстарын нығайтудағы және қазақ өнерін халықаралық деңгейде танытудағы маңызы зор екенін алға тартты. Мәдениет және ақпарат вице-министрі Айбек Сыдыков лауреаттарды Мәдениет және ақпарат министрі Аида Балаеваның атынан құттықтап, олардың шығармашылығына шыңдар тіледі.
