Атырау облысында жоғалып кеткен отбасының ұл-қызы да өлі табылды, – деп хабарлайды 7-su.kz ақпараттық порталы «Ақ Жайық» басылымына сілтеме жасап.
Басылым мәліметінше, қала маңындағы Геолог шағынауданынан Жангелдин ауылының тұрғындары – Наурыз бен Мейрамгүлдің денесі табылған. Олар бұған дейін күдікті Сұлтан Сәрсемалиев әйелімен бірге жалдап тұрған үйдің ауласынан шыққан.
«Кеше Сұлтан мен оның әйелі Ақбаян Алматыға жеткізілді. Алматыда Сұлтан Сәрсемалиев Наурыз бен Мейрамгүлді өлтіргенін мойындап, бұған дейін Геолог шағынауданында жалдап тұрған үйдің ауласына мәйіттерді көмгенін айтқан», – деп жазылған басылым дерегінде.
Осы ақпараттан кейін Атыраудағы тергеушілер аталған учаскені қайта тексеріп, қаза тапқандардың денесін тапқан. Ал Атырау облысы Полиция департаменті бұл оқиғаға қатысты толық ақпарат кейінірек берілетінін мәлімдеді.
Еске салайық, бұған дейін 6 қаңтарда ерлі-зайыптының денесі табылған болатын. 8 қаңтарда оларды ақтық сапарға шығарып салу рәсімі өтті.
Күдікті туралы
Жангелдин ауылында қаза тапқан ерлі-зайыптының өліміне байланысты 29 жастағы Атырау облысы Махамбет ауданының тұрғыны Сұлтан Сәрсемалиевке іздеу жарияланған.
Күдіктіні іздестіру ісі 8 қаңтарда Атырау облысында тіркелген. Істі Қазақстан Республикасы Ішкі істер министрлігінің бастамасымен Атырау облысының Полиция департаменті жүргізген.
24 ақпанда ҚР ІІМ Атырау облысындағы қос кісі өлтіру ісі бойынша күдікті Индонезияда ұсталғанын хабарлады. Сондай-ақ марқұмдардың қызы да күдікті ретінде танылғаны айтылды.
Атырау облысында жоғалған отбасының ісі
Еске салайық, 2025 жылғы 25 желтоқсанда Атырау облысының полициясына бір отбасының жоғалғаны туралы арыз түскен. Осыдан кейін құқық қорғау органдары қылмыстық іс қозғап, іздестіру жұмыстарын бастаған болатын.
