Ақсу ауданының орталығы Жансүгіров ауылында ел тарихындағы маңызды саяси науқан қарсаңында ерекше спорттық әрі патриоттық іс-шара ұйымдастырылды. Тау баурайында өткен марафон жастар мен аудан тұрғындарының бірлігін паш етіп, мемлекеттің басты құжатына деген құрметті көрсетті, – деп хабарлайды 7-su.kz ақпараттық порталы.
«Әр қадам – болашаққа үлес: Ақсуда Конституция пазлы» атты жүгіру марафоны Бөрібай батыр ескерткішінің маңынан бастау алды. Қатысушылар белгіленген бағыт бойынша тау басына қарай бет алып, спорттық төзімділік пен ұйымшылдықтың үлгісін танытты. Марафонның басты ерекшелігі – қатысушылар өздерімен бірге алып шыққан арнайы пазл элементтерінің тау басында біріктірілуі. Нәтижесінде Қазақстан Республикасының Конституциясы кітабының үлкен бейнесі құрастырылды. Пазлдың әрбір бөлігін қоғамның түрлі саласында елеулі жетістікке жеткен азаматтар апарып орналастырды. Символикалық көрініс әрбір саланың ел дамуына қосқан өлшеусіз үлесін және халық бірлігінің маңызын айқын білдірді. Шараға спорт ардагерлері, белсенді жастар және аудан тұрғындары қатысып, салауатты өмір салтын насихаттады.
Марафон қатысушысы Айберген Болатхан өз пікірін білдірді:
«Конституция – еліміздің дамуы мен тұрақтылығының негізі. Осындай мазмұнды іс-шаралар азаматтардың бірлігін нығайтып, ел болашағына деген жауапкершілікті арттырады. Сондықтан әрбір азамат алдағы референдумға қатысып, өз таңдауын білдіруі маңызды деп есептеймін», – деді ол.
Ақсулықтардың шығармашылық бастамасы халық арасында үлкен резонанс тудырды. Мұндай қадамдар Мемлекет басшысы Қасым-Жомарт Тоқаев белгілеген саяси реформаларға қолдау көрсетудің және азаматтық қоғамның пісіп-жетілгенінің айғағы. Пазлдың толық жиналуы мемлекетіміздің тұтастығы мен әрбір азаматтың шешімі ел тағдыры үшін маңызды екенін ұғындырды. Марафон соңында қатысушылар ел ертеңі үшін маңызды таңдау жасауға шақырып, ұрандатты. Осылайша, Жансүгіров ауылының тұрғындары тау биігінде Конституция бейнесін құрастыру арқылы өздерінің саяси сауаттылығы мен патриоттық сезімін жаңа қырынан танытты. Спорт пен саясат астарласқан жиын өңірдегі қоғамдық-саяси мәдениеттің өскенін тағы бір мәрте дәлелдеп берді.
