Облыста «Құқықтық тәртіп» жедел-профилактикалық іс-шарасы аясында қоғамдық қауіпсіздікті қамтамасыз ету және құқықбұзушылықтардың алдын алу бағытында шаралар күшейтілді. Тәртіп сақшылары профилактикалық шаралар жүргізіп, арнайы есепте тұрған тұлғаларды бақылауға алу, сондай-ақ, қоғамдық орындардағы тәртіпті сақтау бағытындағы жұмыстарды атқарды.
Облыстық полиция департаменті бастығының орынбасары Жасұлан Байкеновтің жеке бақылауымен бір тәуліктің ішінде полицияның арнайы есебінде тұрған 543 адам тексерілді. Мұндай тексерулер құқықбұзушылықтың алдын алып, заң талаптарының сақталуын қамтамасыз етуге мүмкіндік береді. Жасұлан Байкеновтің айтуынша, профилактикалық жұмыстар азаматтардың қауіпсіздігін қамтамасыз етуде маңызды рөл атқарады.
– Кез келген құқықбұзушылық алғашқыда елеусіз көрінгенімен жалпы құқықтық тәртіп деңгейіне әсер етеді. Тазалық, тәртіп және заң талаптарын бұлжытпай сақтау – қауіпсіз әрі тұрақты мемлекеттің негізі. Сондықтан профилактика мен бақылау полицияның тұрақты және жеке назарында болады, – деді ол.
«Құқықтық тәртіп» жедел-профилактикалық шарасы барысында патрульдік полиция ротасының қызметкерлері түнгі уақытта Талдықорған қаласында күмән тудырған Volkswagen Passat автокөлігін тоқтатқан. Көліктегі 40 жастағы ер адам медициналық куәландыру нәтижесінде есірткі тұтынған күйде жүргізгені анықталды. Жалпы жыл басынан бері өңір тәртіп сақшылары жол қозғалысы кезінде қауіп төндіруі мүмкін 86 жүргізушіні анықтады.
«Құқықтық тәртіп» жедел-профилактикалық іс-шарасының мақсаты – қоғамда заңға бағыну мәдениетін қалыптастыру, тұрғындардың тыныштығын қамтамасыз ету және өңірде қоғамдық тәртіпті сақтау.
Дастанбек САДЫҚ
