Текелі қаласында көпке үлгі болып жүрген дәрігерлер әулеті ел болашағы үшін өз таңдауын жасап, азаматтық жауапкершіліктің жарқын үлгісін паш етті. Қазақстан үшін маңызды кез келген науқанда алғашқылардың бірі болып дауыс беруді игі дәстүрге айналдырған құрметті жұп, биыл да сол дағдысынан жаңылмай, сайлау учаскесіне бірінші болып келді, – деп хабарлайды 7-su.kz ақпараттық порталы.
Текелі қаласының құрметті азаматы, ардагер дәрігер Александр Сидехменов пен оның өмірлік серігі Тамара Александровна Сидехменова моноқаладағы №445 сайлау учаскесінде өз дауыстарын берді. Көп жылдар бойы медицина саласында аянбай тер төгіп, халық саулығын сақтауға үлес қосқан қариялар үшін бұл қадам – мемлекеттің тұрақтылығы мен дамуына қосқан үлесі.
Ардагерлердің айтуынша, сайлауға қатысу – тек құқық қана емес, сонымен бірге келешек ұрпақтың бақытты өмірі үшін атқарылатын маңызды міндет. Дәрігерлер әулеті еліміздің тағдыршешті сәттерінде қашанда айналасына өнеге болып, белсенділік танытуды парыз санайды.
