Текелі қаласының тұрғындары бүгін бірлік пен ынтымақтың жарқын үлгісін көрсетіп, республикалық референдумға жоғары деңгейде қатысуда, – деп хабарлайды 7-su.kz ақпараттық порталы.
Таулы өлкедегі саяси науқанның барысы халықтың ел болашағына деген оң көзқарасын білдіреді. Солардың қатарында Текелі қалалық Мәдениет үйінде орналасқан №447 референдум учаскесіне Славян этномәдени орталығы мүшелері жұмылған жұдырықтай бірге келіп, өз таңдауларын жасап жатыр.
Түрлі этнос өкілдері шоғырланған ұжымның сайлау учаскесіне бірге келуі қоғамдағы татулықтың нышаны іспеттес. Дауыс беру сәтінде қалалық славян этномәдени орталығының жетекшісі Константин Нестеров:
«Мұндай маңызды саяси оқиғаларға қатысу – әр азаматтың ортақ жауапкершілігі. Бірлік пен татулық – еліміздің басты құндылығы. Бүгін, міне, славян этномәдени орталығының мүшелері тек дауыс беріп қана қойған жоқ, сонымен қатар қоғамдағы ынтымақ пен өзара құрметтің көрінісін паш етті. Түрлі этнос өкілдері тату-тәтті өмір сүріп жатқан еліміз тағы бір белесті бағындырып, өсіп-өркендеудің жаңа кезеңіне өтеді деп сенемін. Болашаққа бірге қадам жасайық, белсенді болайық», – деп азаматтарды белсенді болуға шақырып, өз пікірін білдірді.
