Алакөл ауданына қарасты Қамысқала ауылы – негізінен балықшылар мекендейтін, ата кәсібін ұрпақтан-ұрпаққа жалғап келе жатқан еңбекқор жандардың ауылы.
Осы ауылдағы №63 сайлау учаскесіне балықшылықпен айналысатын Ақболатовтар әулеті ұйымшылдықпен келіп, өз таңдауын жасады. Бір әулеттен 15 адам бірге дауыс беріп, ел болашағына бейжай қарамайтындықтарын көрсетті.
Әулеттің ең үлкені 60 жаста болса, ең жасы 25 жастағы келіні. Яғни, бірнеше буын өкілі бір мақсатпен келіп, азаматтық парызын орындады. Бұл – бір әулеттің ғана емес, тұтас Қамысқала балықшыларының бірлігі мен жауапкершілігін көрсететін ерекше көрініс.
Күн сайын көлмен тілдесіп, балық аулап еңбек ететін бұл әулет бүгін де ел болашағына бағыт беретін таңдауда белсенділік танытып, көпшілікке үлгі болды.
«Жетісу-Ақпарат»
