Бірлігі мен ынтымағы жарасқан Кербұлақ ауданындағы Басши ауылы қай істі де бірлесіп атқаруды құп көреді. Елімізде жүзеге асып жатқан саяси реформаның негізі болатын референдумда да ауыл тұрғындары сол үдеден төмендемеді.
Ақсақалдар бастап, жас буын қолдап, ел болашағына таңдау жасады. Осылайша үлгі көрсетті. Бірлесіп, бірлік туын биіктетті. Ауыл ақсақалы Өмірбек Жақыпбек елдің келешегі үшін өз отбасымен қатар, көрші-қолаңды да дауыс беруге ертіп барды. Айтуынша, Қазақстанның демократиялық даңғылы ауылдан басталуы керек.
– Басши ауылының тұрмысы әуелден үлкенді тыңдап, кішіге ізет көрсетуімен ерекшеленеді. Сол арқылы берекемізді тасытып тұрмыз. Бірлікті ту еткен ұстанымымызбен аға буын бастап, жас буын қоштап, көше-көше болып жиылып, балаларымыз үшін дауыс бердік. Жастарға батамызды беріп, ақсақалдығымызды жасадық, – дейді ақсақал.
