Елімізде 16 наурыз Мәдениет және ұлттық салт-дәстүр күні ретінде аталып өтті. Бұл – халқымыздың сан ғасырлық тарихынан сыр шертетін, ұлттық болмысымызды айшықтайтын, ата-бабадан қалған асыл мұраларды дәріптейтін ерекше мереке.
Осы атаулы күні Мұхамеджан Тынышбайұлы атындағы тарихи-өлкетану музейі «Ұлттық рухтан – жаңашылдыққа» атты көрме ұйымдастырды. Музей қызметкері Қалқаман Әбдірахманұлы келген қонақтарға шараның маңызы жайлы айтты. Көрме – қазақ халқының дәстүрлі тұрмыстық бұйымдары мен олардың бүгінгі замандағы баламаларын салыстыруға арналды.
Көрменің басты мақсаты – ұлттық мұраның уақыт өткен сайын жоғалмай, керісінше жаңарып, жаңа технологиялармен үндесе отырып қазіргі қоғам өмірінде өз жалғасын тауып келе жатқанын көрсету. Қазақ халқының тұрмысында кеңінен қолданылған торсық, бесік, кісе белдік, күбі, келі-келсап, саба, қазан секілді құнды жәдігерлер ұсынылған. Көрменің тағы бір ерекшелігі – қазіргі заман талабына сай жаңа технологияларды пайдалануында.
Биылғы жылды Мемлекет басшысы Қасым-Жомарт Тоқаев «Цифрландыру және жасанды интеллект жылы» деп жариялағаны белгілі. Осыған орай көрме алғаш рет жасанды интеллект көмегімен таныстырылып, арнайы дайындалған бейнебаян ұсынылды.
Мәдениет және ұлттық салт-дәстүр күніне орай Сәкен Сейфуллин атындағы орталық кітапханада «Салт-дәстүр және тұрмыс» атты кең көлемді кітап көрмесін қойды. Наурыз мерекесінің тарихы мен маңызын кеңінен насихаттап, қазақ халқының бай салт-дәстүрі мен рухани мұрасын жас ұрпаққа таныстыруды мақсат еткен көрмеге облыстық мамандандырылған күзет басқармасының қызметкерлері, облыстық полиция департаменті жанындағы «Жас сақшы» сыныптарының оқушылары және колледж студенттері қатысты. Қатысушылар ұлттық мәдениеттің мәні туралы тың мәлімет алып, қазақ халқының тарихи-мәдени мұрасымен жақынырақ танысты.
Кітапхана қызметкері Лина Айдынқызының айтуынша, көрмеге 100-ден астам кітап, ғылыми еңбек пен танымдық басылымдар ұсынылған. Мұндағы әдебиеттерде Наурыз мерекесінің шығу тарихы, қазақ халқының салт-дәстүрлері мен әдет-ғұрыптары, ұлттық дүниетаным мен отбасылық тәрбие мәселелері кеңінен қамтылған. Сонымен қатар көрмеде қазақтың күй өнері, халық әндері, дәстүрлі музыкалық аспаптары туралы әдебиеттер және асық ату, тоғызқұмалақ, алтыбақан, көкпар секілді ұлттық ойындардың тарихы мен тәрбиелік мәні жайлы еңбектер де қойылған.
Наурызнаманың онкүндігі аясында өткен бұл шара ұлттық құндылықтарды насихаттап, оқырмандарды кітап арқылы халқымыздың бай мұрасын тануға үндейтін тағылымды мәдени бастама болды.
Гүлжан ТҰРСЫН
