Қазақстандық танымал боксшы, әлемнің екі дүркін чемпионы және Токио Олимпиадасының жүлдегері Сәкен Бибосынов кәсіби рингтегі кезекті жекпе-жегін өткізуге дайындалып жатыр. Бұл жолы отандасымыз өз мансабындағы алғашқы маңызды титул үшін қолғап түйістіреді. Спортшының қатысуымен өтетін айқас жанкүйерлер үшін үлкен жаңалық болып отыр, – деп хабарлайды 7-su.kz ақпараттық порталы sportbugin.kz парақшасына сілтеме жасап.
Бибосыновтың қарсыласы – индонезиялық былғары қолғап шебері Сурия Дхарма. Қарсыластың кәсіпқой рингтегі рекорды жаман емес, ол осы уақытқа дейін 4 жеңіске жетіп, оның үшеуін нокаутпен аяқтаған. Екі мықты спортшы арасындағы тартысты кездесу 17 сәуір күні Қырғызстан астанасы Бішкек қаласында өтеді. Боксшылар WBA Asia белбеуі үшін бақ сынайды.
Сәкен Бибосынов үшін аталған жекпе-жек өте маңызды сынақ болмақ. Спортшының айтуынша, ол кәсіпқой рингте алғаш рет он раундқа созылатын айқасқа жоспарланған.
«Титулдық жекпе-жекке дайынмын. Аталған кездесу мен үшін он раундқа жоспарланған алғашқы айқас болады. Қарсыласым өте мықты», – деп атап өтті боксшы өз сөзінде.
Аталған сәт Сәкеннің физикалық дайындығы мен төзімділігін жаңа деңгейде көрсететін мүмкіндік.
Айта кетейік, Сәкен Бибосынов кәсіпқой бокстағы алғашқы қадамдарын сәтті бастаған болатын. Ол 2025 жылдың 20 шілдесінде Бішкекте өткен дебюттік жекпе-жегінде филиппиндік Кристиан Леганені бірінші раундта-ақ сұлатып түсіріп, сенімді жеңіске жетті. Кейіннен екінші кездесуінде жергілікті боксшы Адилет Качкынбековпен жұдырықтасып, төрешілердің ортақ шешімімен басым түскен еді.
Қазіргі таңда қазақстандық былғары қолғап шеберлерінің кәсіпқой бокстағы беделі жоғары. Сәкеннің қадамы оның алдағы уақытта әлемдік деңгейдегі негізгі титулдарға таласуына жол ашпақ. Жанкүйерлер Сәкен Бибосыновтың кезекті жеңісін асыға күтеді және оның WBA Asia белбеуін иеленетініне сенімді.
