Бүгін, 2026 жылғы 20 наурызда Қазақстан мұсылмандары қасиетті Рамазан айының аяқталғанын білдіретін Ораза айт мерекесін қарсы алды, – деп хабарлайды 7-su.kz ақпараттық порталы Qazaqtoday ақпарат агенттігіне сілтеме жасап.
Таң сәріден еліміздің барлық мешіттерінде жамағат жиналып, мерекелік Айт намазы оқылды. Ораза айт – мейірім мен кешірімнің, қайырымдылық пен бауырмалдықтың мерекесі. Бұл күні мұсылмандар ақ дастарқан жайып, туған-туыс пен дос-жаранның үйіне қонаққа барады, бір-біріне ізгі тілектерін арнап, реніштерін ұмытады.
Діни қағидаларға сәйкес Ораза айт Рамазан айынан кейінгі бір күн болып саналғанымен, көптеген мұсылман елдерінде, соның ішінде Қазақстанда да мереке үш күн бойы тойланады. Биыл мерекелік күндер 20-23 наурыз аралығына түсіп отыр. Қазіргі таңда Қазақстан халқының шамамен 70% үлесін мұсылмандар құрайды.
Еліміздегі дін ұстанушылардың басым көпшілігі 699-767 жылдары өмір сүрген Әбу Ханифа іліміне негізделген, исламдағы төрт канондық құқықтық мектептің бірі саналатын ханафи мәзһабын ұстанады. Мереке аясында қайырымдылық шаралары өткізіліп, мұқтаж жандарға көмек көрсету дәстүрге айналған.
