Бүгін Астанада Әлемдік және дәстүрлі діндер лидерлері Съезі Хатшылығының XXIV отырысы өтеді. Халықаралық диалог алаңына әлемнің 20 елінен дін өкілдері, мемлекеттік және халықаралық ұйымдардың басшылары, сарапшылар жиналады, – деп хабарлайды 7-su.kz ақпараттық порталы.
Отырыстың негізгі мәселелерінің бірі жасанды интеллектіні діни салада қолданудың этикалық қағидаларын айқындайтын құжатты қарау болмақ.
Күн тәртібінде сондай-ақ «Діндердің климаттың өзгеруіне қарсы күрестегі рөлі» атты халықаралық құжат бар. Екі құжат та Қазақстан Президенті Қасым-Жомарт Тоқаевтың Әлемдік және дәстүрлі діндер лидерлерінің VIII Съезінде көтерген бастамалары негізінде әзірленген.
Жиында жазылмайтын дертке шалдыққан балалардың құқықтары туралы хартия да таныстырылады. Құжатта баланың қадір-қасиетін қорғау, оған ізгілікпен қарау, қажетті медициналық және психологиялық көмек алу құқығына басымдық берілген.
Ұйымдастырушылардың мәліметінше, құжатта бала қажет болған жағдайда оның діни және дүниетанымдық ерекшеліктерін ескеретін қолдау көрсету мүмкіндігі де қарастырылған.
Қазақстан үшін бұл отырыстың тағы бір ерекшелігі – діни диалогтың қазіргі заманның екі өзекті мәселесімен, яғни жасанды интеллект пен климаттың өзгеруімен байланыстырылуы.
XXIV отырыс Астанадағы Бейбітшілік және келісім сарайында өтеді.
