Бұған дейін облыстық кәсіпкерлер палатасы бизнестің құқықтары мен заңды мүдделерін қорғауға бағытталған өткен жылғы жұмыс қорытындысын шығарған болатын.
Ал енді бизнесті өзге бағыттар бойынша қызмет нәтижелері туралы хабардар етеміз. Соның бірі – кәсіпкерлерге және кәсіпкерлік бастамасы бар халыққа ақпараттық-кеңес қызметін көрсету. Кәсіп ашу, дамыту, бухгалтерлік, салық есебін жүргізу, сондай-ақ, мемлекеттік қолдау шараларына қатысты мәселелер бойынша «Атамекен» ҰКП аймақтардағы палаталарының және олардың филиалдары жанында жұмыс істейтін қәсіпкерлерге қызмет көрсету орталығында көрсетіледі.
Облыста кәсіпкерлерге қызмет көрсету орталығының 9 аудандық бөлімшесі жұмыс істейді. Өткен жылы кәсіпкерлерге қызмет көрсету орталықтарының менеджер-кеңесшілері 6 мыңнан аса қызмет көрсетті. Қалыптасқан тәжірибе бойынша аймақ халқы ақпаратты офлайн режимінде алғанды жөн көреді. Мемлекеттік бағдарламаларды түсіндіруден басқа, ісін жаңа бастаған кәсіпкерлерге қаржыландыру үшін құжаттар жинауға, бизнес-жоспар жасауға, салық режимін таңдауға, инженерлік желілерге қосылуға техникалық шарттар алуға көмек көрсетеді.
«Атамекен» ұлттық кәсіпкерлер палатасы табысты іске асырып жатқан «Іскерлік байланыстар» жобасы аясында бизнес субъектілері Германия немесе Жапонияда тағылымдамадан өту мүмкіндігін пайдалана алады. Өткен жылы облыстық кәсіпкерлер палатасына газ саласы субъектісінен Жапонияда тағылымдамадан өтуге өтініш түсті. Сөйтіп, өңірлік палата күн шығыс еліне шығуды ұйымдастыруға ықпал етті.
«Ауыл аманаты» жеңілдікті несиелендіру бағдарламасын іске асыруға жанама қатыса отырып, өңірлік палата сарапшылары кепіл мүлкі нысандарының мекенжайларына барып, қажет болған жағдайда қаражатты мақсатты пайдалану мәселелеріне байланысты бизнес бойынша кеңес беріп, қажетті құжаттар топтамасын жинауға көмектеседі.
– 2024 жылы нақты қаржыландыру жүзеге асырылмағандықтан, өңірлік палата 2025 жылы несиелік комитеттің табысты қарауы үшін 274 өтінімді толық өзектендіру мен жаңартуды жүргізді, – дейді шағын кәсіпкерлікті дамыту бөлімінің басшысы Бекмұрат Мұсахан.
Облыстық кәсіпкерлер палатасының директоры Дәурен Оңалбаев палата жанындағы 9 салалық кеңес қызметіне қысқаша тоқталды. Өткен жылы салалық кеңестер 70 отырыс өткізіп, онда 100-ге жуық проблемалық бизнес мәселелері қаралды. Облыстық кәсіпкерлер палатасының салалық кеңестерінің жетістіктеріне тоқталған Дәурен Оңалбаев оңайлатылған декларация негізінде Текелі, Талдықорған қалаларында, Кербұлақ ауданында арнайы салық режимінің мөлшерлемесін 4%-дан 2%-ға дейін төмендетуге қол жеткізілгенін атап өтті. Сондай-ақ, аймақтың басқа аудандарындағы жергілікті атқарушы органдар арнайы салық режимі мөлшерлемесін тек 1%-ға (4-тен 3-ке дейін) төмендетуге келіскені аталып өтті.
Айгүл БАЙБОСЫНОВА
