Алматыда 21 наурыз күні үш адамның өмірін қиған ауыр жол апатына қатысты жаңа мәліметтер пайда болды. Күдіктінің ірі кәсіпкер болуы мүмкін екені айтылуда, – деп хабарлайды 7-su.kz ақпараттық порталы.
Қайғылы оқиға әл-Фараби даңғылы бойында болған. Алдын ала дерек бойынша, 009JET мемлекеттік нөмірі бар Zeekr көлігі қарсы бағытқа шығып, бетпе-бет келе жатқан Mercedes-пен соқтығысқан.
Салдарынан жеңіл көлікте отырған үш адам – 29 жастағы жүргізуші және екі жолаушы қыз оқиға орнында қаза тапты. Қыздардың бірі 22 жаста, екіншісі 20 жаста болған.
Жол талғамайтын көлікті басқарған ер адам ауыр жарақат алған. Дәрігерлер оның қабырғалары, жамбас сүйегі және оң аяғы сынғанын анықтаған.
Бұл жағдай әлеуметтік желілерде бірнеше күн бойы қызу талқыланып жатыр.
Алдын ала мәліметтерге сәйкес, Zeekr көлігінің жүргізушісі – 32 жастағы Александр Пак. Ол Алматының жоғарғы бөлігінде тұрады. Оның атына екі компания тіркелген: «ГУ ХОЗУ Алматы» және «Глобал Партнер» ЖШС. Екі ұйымның да құрылтайшысы ретінде көрсетілген.
«ГУ ХОЗУ Алматы» компаниясы 2025 жылы құрылған және бір жыл ішінде шамамен 500 мың теңге салық төлеген. Ал «Глобал Партнер» ЖШС-нің қаржы айналымы әлдеқайда жоғары – 2024 жылдың күзінен бері бюджетке 50 миллион теңгеден астам қаражат аударған. Сарапшылар мұны көлік құнымен де байланыстырады: мұндай автокөлік шамамен 100 мың доллар тұрады.
Оқиғаға байланысты құқықтық жауапкершілік мәселесі де көтерілуде. Қылмыстық кодекстің 345-бабы 4-бөлігіне сәйкес, мұндай жағдайда 5 жылдан 10 жылға дейін бас бостандығынан айыру жазасы қарастырылған. Көп жағдайда сотталғандар қауіпсіздігі ең төменгі колонияларға жіберіледі.
Куәгерлердің айтуынша, апат болған түні Zeekr 9X басқа көлікпен жарысқан болуы мүмкін. Бұл жайт іс бойынша маңызды мән-жай ретінде қарастырылуы ықтимал.
Сарапшылардың пікірінше, бірқатар елдерде мұндай құқықбұзушылықтарға жаза қатаңырақ. Мәселен, Ресей заңнамасында мұндай жағдай үшін 15 жылға дейін жаза қарастырылса, АҚШ-та бұл мерзім 20 жылдан асуы мүмкін. Ал Германия-да кей жағдайларда мұндай әрекет адам өлтіру ретінде бағаланып, өмір бойына бас бостандығынан айыру жазасы тағайындалған.
