Қазақстан бокс федерациясының ресми Instagram парақшасында жарияланған мәліметке сәйкес, Серік Сәпиев федерация президентінің боксты дамыту жөніндегі кеңесшісі қызметіне тағайындалды, – деп хабарлайды 7-su.kz ақпараттық порталы.
Жаңа қызметінде ол ұлттық құрамалардың нәтижесін жақсарту, боксты дамыту бойынша жүйелі жұмысты күшейту және Олимпиада ойындарында жоғары жетістіктерге қол жеткізу бағытында жұмыс жүргізеді.
Айта кетейік, бұған дейін Серік Сәпиев Қазақстан Туризм және спорт министрінің штаттан тыс кеңесшісі, сондай-ақ XX жазғы Азия ойындарына дайындық жөніндегі штабтың спорт бөлімінің үйлестірушісі қызметтерін атқарған.
Серік Жұманғалиұлы Сәпиев 1983 жылы дүниеге келген. Ол бокстан Олимпиада чемпионы, екі дүркін әлем және Азия чемпионы. Сонымен қатар ҚР Еңбек сіңірген спорт шебері, «Парасат» орденінің және Вэл Баркер кубогінің иегері.
