Үйгентас орман шаруашылығында өрт қауіпті кезеңге дайындық жұмыстары қарқынды түрде жүргізілуде.
Қазіргі уақытта орман шаруашылығы тарапынан өрттің алдын алуға және мүмкін болатын өрт ошақтарын дер кезінде сөндіруге бағытталған кешенді ұйымдастырушылық және тәжірибелік жұмыстар атқарылуда. Осы бағыттағы маңызды шаралардың бірі – мекемелер арасындағы өзара іс-қимылды нығайту. Аудандық төтенше жағдайлар бөлімімен, полиция органдарымен, сондай-ақ, шекаралас табиғатты қорғау және орман шаруашылығы ұйымдарымен бірлескен жоспарлар жасалып, нақтылануда. Төтенше жағдай туындаған кезде хабарландыру және әрекет ету тәртібі айқындалуда. Сонымен қатар, өртке қарсы техниканы дайындау жұмыстары жүргізілуде. Өрт сөндіру автокөліктері, мотопомпалар, ранцтық өрт сөндіргіштер, байланыс құралдары және басқа да жабдықтардың жарамдылығы тексерілуде. Жанар-жағармай қоры мен өртке қарсы құрал-жабдықтар жеткілікті.
Профилактикалық жұмыстарға да ерекше мән берілуде. Үйгентас орман шаруашылығының қызметкерлері мектептерде дәріс өткізіп, оқушыларға өрт қауіпсіздігі ережелерін және орманды қорғаудың маңыздылығын түсіндіруде. Сондай-ақ, тұрғындармен кездесу ұйымдастырылып, құрғақ шөпті өртеуге тыйым салынатыны, өрт қауіпсіздігі талаптарын бұзғаны үшін жауапкершілік қарастырылғаны туралы түсіндірме жұмыстары жүргізілуде. Өрт шыққан жағдайда тиісті қызметтерге дер кезінде хабарлау қажеттігі ескертілуде.
Үйгентас орман шаруашылығы аудан тұрғындарын өрт қауіпсіздігі талаптарын қатаң сақтауға шақырады. Табиғи байлығымыз – орманды сақтау және төтенше жағдайлардың алдын алу баршамыздың ортақ міндетіміз.
Данияр АБЖАНОВ,
Үйгентас орман шаруашылығы КММ
Көкжар орманшылығының орманшысы
