Бір кездері блог жүргізу жеке ойды бөлісудің немесе бос уақытты өткізудің бір тәсілі еді. Ал бүгінде бұл сала жарнама мен маркетингтің маңызды құралына айналды.
Лайк, қаралым, жазылушы сияқты көрсеткіштер енді жай статистика емес, нақты экономикалық мәнге ие. Халықаралық зерттеулер де осы үрдісті растайды. Statista мәліметіне сәйкес, инфлюенсер маркетинг нарығы соңғы жылдары ондаған миллиард доллар көлеміне жетіп, тұрақты өсім тапқан. Бұл блогерлердің аудиториясы жарнама үшін маңызды ресурсқа айналғанын көрсетеді.
Қазіргі блогерлердің негізгі табыс алаңдары – Instagram, TikTok және YouTube. YouTube-та авторлар видеодағы жарнамадан табыс тапса, Instagram мен TikTok-та брендтік интеграциялар кең таралған. Аудиториясы үлкен блогерлер бір ғана жарнамалық жарияланым үшін қомақты қаражатқа ие бола алады.
Дегенмен блогерлік сырт көзге оңай көрінгенімен, бұл сала тұрақты еңбекті талап етеді. Контент жоспарлау, видео түсіру, монтаж жасау, аудиториямен байланыс орнатуға кәсіби дағды мен уақыт қажет. Қазақстанда да блогерлік біртіндеп жарнама нарығының бір бөлігіне айналып келеді. Маркетинг мамандары инфлюенсер арқылы жарнама беру кей жағдайда дәстүрлі жарнама түрлерінен тиімді екенін айтады. Себебі блогер аудиториясы белгілі бір тақырыпқа қызығатын нақты қауымнан тұрады. Алайда бұл саланың қиындықтары да бар. Психологиялық қысым, хейт, тұрақсыз табыс және алгоритм өзгерістеріне тәуелділік блогерлік өмірдің көрінбейтін қырлары саналады.
Блогерлік – уақытша қызығушылық емес. Бұл қазіргі цифрлық дәуірдің жаңа экономикалық құбылысы. Әлеуметтік желідегі парақша жай күнделік емес. Дұрыс басқарылса, табыс әкелетін цифрлық активке айналады.
Сағынгүл ҚҰРАЛБЕК,
ЖУ студенті
