Талант пен табандылық жас ұрпақтың жарқын болашағын айқындайтын қос қанат. Осындай қасиеттерді бойына сіңіріп, білім мен спортты қатар алып жүрген жас дарынның бірі – Алуа Азаматқызы.
Алуаның әкесі – электрик, анасы – медбике. Тіршіліктің қайнаған ортасында өскен ол бала кезінен-ақ білімге ерекше құштарлығымен көзге түсіп, ұстаздарының сенімін ақтап келе жатқан озат оқушы. Оның оқу үлгерімі табандылық пен жауапкершіліктің нақты көрінісі десек болады.
Жас дарынның ғылымға деген қызығушылығы үлкен жетістіктерге жетелеп келеді. Алуаның аудандық «Дарын» ғылыми жоба байқауында І орын иеленіп, облыстық кезеңде ІІІ орынға қол жеткізуі – ізденімпаздығы мен еңбекқорлығының айқын дәлелі. Ол бұл жеңістер болашақ биіктердің бастамасы деп санайды.
Талантын тек біліммен шектемеген Алуа спортта да өзін дәлелдеп жүрген дарынды жас. Волейбол алаңында ерекше шапшаңдығымен, командалық рухымен көзге түсіп, мектептің, ауданның, облыстың намысын қорғап жүрген үздік ойыншының бірі. Спортқа деген сүйіспеншілігі көптеген жеңіске жетуіне жол ашуда. Соның жарқын дәлелі – «Ауыл спорты» жобасы аясында Қазақстан Республикасының чемпионы атануы. Бұл жетістік Алуаның тек жеке жеңісі ғана емес, ауыл спортының да мерейін өсірген маңызды белес. Чемпиондық атақ оған жаңа мүмкіндіктер сыйлап, халықаралық деңгейге жол ашып отыр.
Жас спортшы Түркияның Анталия қаласында өткен «Antalya Volleyball Friendship Cup U-16» халықаралық турниріне қатысты. Алдағы додада ел намысын абыроймен қорғап, алтын жеңіп алды.
Медет ЖҰМАБАЙ
