Диқандар үшін жауапты кезең басталды. Жетісу облысында Текелі қаласынан басқа, барлық аудандарда көктемгі дала жұмыстары қарқын алды. Биыл ауыл шаруашылығы дақылдарының егіс көлемі 511,8 мың гектарды құрап отыр. Оның ішінде дәнді дақылдар 286,7 мың гектарға, майлы дақылдар 105,4 мың гектарға, ал қант қызылшасы 13 мың гектарға егілмек. Егіс алқаптарын әртараптандыру шеңберінде биыл дәндік жүгері 5,2 мың гектарға, ал қант қызылшасы 708 гектарға артты.
Бұл жөнінде Бейсен Құранбек атындағы журналистер үйіне арнайы келген Жетісу облысының ауыл шаруашылғы басқармасы басшысының орынбасары Бақтияр Шампиковпен «Аграрлық несие корпорациясы» АҚ Жетісу облысындағы филиалдың директоры Қайрат Әлімқұлов айтты. Спикерлердің сөзінде науқанның сәтті өтуіне техника сақадай сай. Бүгінде 20,3 мың техника жөндеуден өтіп, далаға шықты. Қазіргі таңда 29 мың гектар жер жыртылды. Бүгінге дейін 5 мың гектардан астам алқапқа бидай, арпа, мақсары және көпжылдық шөптер себілді. Шаруаларға қажетті 51,9 мың тонна жаздық дақылдардың тұқымы толық көлемде дайындалып, зертханалық тексеруден өтуде.
Мемлекет тарапынан болатын қолдау да ерекше. Тұқымдарды субсидиялауға 1 миллиард 566 миллион теңге бөлінді, бұл өткен жылмен салыстырғанда 512 миллион теңгеге артық. Сондай-ақ, пестицидтерге 750 миллион теңге қарастырылған. Шаруалардың минералды тыңайтқыштарға қолжетімділігін арттыру үшін биылдан бастап «аванстық субсидиялау» тетігі іске қосылды. Бұл жүйе бойынша диқандар зауыт бағасының тек жартысын ғана төлейді, қалған бөлігін мемлекет тікелей зауытқа аударады.
Аймақ үшін стратегиялық маңызы бар қант қызылшасын себу жұмыстарын 5 сәуірден бастап, 10 мамырға дейін аяқтау жоспарланған. Зауыттардың жұмысын ерте бастау мақсатында биыл 1,9 мың гектарға ерте пісетін 120 күндік «Авантаж» сорты егілмек. Бұл қызылшаны 10 қыркүйектен бастап қабылдауға мүмкіндік береді.
Қаржылық қолдау бағытында «Кең дала» бағдарламасы бойынша 10,8 миллиард теңге бөлініп, бүгінге дейін 240 шаруашылық 7,3 миллиард теңге көлемінде жеңілдетілген несие алды. Ал «ҚазАгроҚаржы» арқылы техника паркін жаңартуға 15 миллиард теңге қарастырылып, алғашқы 53 техника сатып алынды. Дизель отыны бойынша да мәселе шешілген: наурыз айына бөлінген отын кестеге сай таратылуда. Осылайша, облыста көктемгі егіс науқанын сапалы әрі уақытылы өткізу үшін барлық жағдай жасалған.
«ЖЕТІСУ-АҚПАРАТ»
