Еліміздің энергетика саласында ауқымды өзгерістер орын алмақ. Энергетика министрлігі 2026–2030 жылдарға арналған көмір генерациясын дамыту жөніндегі ұлттық жобаны бекітті, – деп хабарлайды 7-su.kz ақпараттық порталы.
Бұл ұлттық жоба электр энергиясына күн санап өсіп келе жатқан сұранысты өтеуге және еліміздің Біртұтас электр энергетикалық жүйесінің тұрақтылығын нығайтуға негізделген. 2030 жылға дейін жалпы қуаты 7,8 ГВт болатын жаңа және жаңартылған нысандарды іске қосу жоспарланып отыр. Оның ішінде 8 мүлдем жаңа станция салу және жұмыс істеп тұрған 11 нысанды жаңғырту көзделген.
Жалпы қуаты 5,3 ГВт болатын жаңа нысандар еліміздің маңызды өңірлерін қамтиды. Құрылыс жоспарына келесі нысандар енген:
- Екібастұз ГРЭС-3: ең ірі нысан (2 640 МВт);
- Курчатов: конденсациялық электр станциясы (700 МВт);
- Жезқазған: жаңа ЖЭО (500 МВт);
- Семей мен Өскемен: әрқайсысы 360 МВт болатын ЖЭО-лар;
- Қарағанды (350 МВт) және Көкшетау (240 МВт): жаңа жылу-электр орталықтары;
- Екібастұз: қосымша ЖЭС (180 МВт).
Жобаның тағы бір маңызды тұсы – қолданыстағы станцияларды жаңарту. Бұл жұмыстар жабдықтардың тозу деңгейін 13 пайызға төмендетуге мүмкіндік береді. Осылайша, ескірген инфрақұрылым жаңғыртылып, энергия шығыны азаяды.
Көмір генерациясы еліміздің энергетикалық қауіпсіздігінде шешуші рөл атқара бермек. Алайда, бұл процесс қатаң экологиялық стандарттарды сақтай отырып, заманауи технологиялардың көмегімен жүзеге асырылады.
Бұл қадамдар өнеркәсіптің өсуіне, цифрлық экономиканың дамуына және жасанды интеллект технологияларын кеңінен ендіруге берік негіз болады. Жаңа станциялардың салынуы тек жарық пен жылу ғана емес, сонымен қатар мыңдаған жаңа жұмыс орнын ашуға және өңірлердің экономикалық әлеуетін көтеруге септігін тигізеді.
