Астанадағы «Барыс Аренада» 5-13 сәуірде волейболдан әйелдер командалары арасында ел чемпионатының 35-ші маусымының жеңімпазы анықталады. Чемпиондыққа таласатын төрт команда белгілі. Олар «Жетісу», «Қуаныш» (Солтүстік Қазақстан облысы), «Берел» (Шығыс Қазақстан облысы) және «Тұран» (Түркістан облысы) командасы. Жартылай финалдан бастайтын төрт команда екі жеңіске дейін ойнайды.
Былтырғы маусымда қатысқан жарыстарының бәрінде жеңіске жеткен «Жетісу» биыл чемпиондықты сақтап қалу үшін барын салатындығы анық. Биылғы чемпионатта «Жетісу» турнирлік кестені 79 ұпаймен 1-орында аяқтап, тек 1 кездесуде жеңіліп (Соңғы турда «Қуаныштан» жеңілді), қалған жалпы 27 ойында жеңіске жетті.
«Жетісу» Петропавлда болған соңғы 4-үлкен турдан 25-наурызда келіп, бірден жаттығуға кірісті.
– Плей-оффқа қалағанымыздай дайындалу үшін уақыт жеткіліксіз екендігі түсінікті. Өте тығыз болып тұр. Соңғы турдағы және жалпы чемпионаттағы қателіктерден қорытынды шығарып, ойыншылар барын салып жаттығуға кірісті. Біздің мақсатымыз айқын. Сол үшін жұмыла жұмыс істеп жатырмыз. Команда бұны жақсы біледі. Дайындығымыз жақсы, барлық ойыншы қатарды, – дейді «Жетісу» волейбол клубының бас бапкері Марко Гршич.
«Жетісу» турнирлік кестені 4-орынмен аяқтаған «Тұран» командасымен жартылай финалда кездеседі.
6 сәуір, 16:00 – «Жетісу» – «Тұран».
7 сәуір, 16:00 – «Жетісу» – «Тұран».
Егер тең түскен жағдайда 8 сәуірде үшінші рет жолығады.
Ал финалдық ойындар 10-12 сәуірге жоспарланған.
Серік ҚАНТАЙ
