Жастарға аға буынның жол көрсетіп, ізгілікке шақыруы қашанда маңызды. Белгілі бір биікті бағындырған тұлғалардың өмір жолы кейінгіге үлгі. Осы ретте «Ментор» жобасы аясында қала әкімі Ернат Бәзіл Абай атындағы №1 орта мектеп-гимназияның оқушыларымен кездесті. Жеткіншектерге ағалық ақылын айтып, болашақтарына сенім артты.
Кездесу барысында өрендер ән шырқап, күй ойнады. Жас ақындар өлең оқып, өз өнерлерін ортаға салды. Шара шеңберінде Ернат Дүйсенбекұлының өмір жолымен танысып, жеткен жетістіктерінен мағлұмат алды.
Жиын еркін форматта ұйымдастырылды. Оқушылар қала әкіміне көкейлеріндегі сұрақты қойып, тұшымды жауап алды. Өз кезегінде шаһар басшысы балалық шағындағы қызықты оқиғалар туралы, мемлекеттік қызметке қалай келгендігі жөнінде әңгіме өрбітті. Сондай-ақ, оқыған кітаптары тұрғысында да ақпар берді. Балаларға үнемі спортпен шұғылдану керектігін ескертіп өткен Ернат Бәзіл шара аясында қаланың болашақ жоспарымен бөлісті. Жаңадан бой көтеретін ғимараттардың, ойын-сауық кешендерінің жай-күйімен таныстырды.
Жиында «Ментор» жобасының қызметі ерекше аталды.
– Біз «Ментор» жобасы аясында көптеген іс-шаралар ұйымдастырып келеміз. Оқушылардың көкжиегін кеңейту мақсатында түрлі саланың өкілдерін шақырып сұхбат құрудамыз. Облыс әкімінің бастамасымен жүзеге асырылып келе жатқан бұл жобаның балалар үшін берері мол. Қазір қалада 31 ментор бар. Олардың еңбегі өз нәтижесін беруде. Біз балаларды дамыту үшін құқықбұзушылық, зорлық-зомбылық, буллинг және кибербуллинг, креативті ойлау, саламатты өмір салты, қаржылық сауаттылық сынды, тағы да басқа тоғыз бағытта жұмыс істеудеміз, – дейді №1 орта мектеп-гимназияның әдеп және құқық жөніндегі менторы Ақмарал Қасымбаева.
Айта кетейік, «Әдеп-құқық жөніндегі ментор» жобасы жұмыс істеп келе жатқанына бір жарым жыл. Мұндағы басты мақсат – мұғалім мен оқушы, ата-ана мен бала арасына алтын көпір болып, байланыс орнату.
Шалқар АҚСАҚАЛ,
ЖУ студенті
