Ақмола облысында өткен кездесуде Премьер-министрдің орынбасары, Ұлттық экономика министрі Серік Жұманғарин фермерлермен аграрлық саланы дамыту мәселелерін талқылады. Жиын барысында мал шаруашылығын қолдауға бағытталған екі жаңа несие бағдарламасы – «Игілік» пен «Береке» іске қосылғанын айтты, – деп хабарлайды 7-su.kz ақпараттық порталы.
Аталған бағдарламалар асыл тұқымды мал сатып алуға арналған және жылдық 6 пайызбен ұсынылады. «Игілік» орта шаруашылықтарға (100–500 ірі қара, 500–1000 ұсақ мал), ал «Береке» ірі шаруашылықтарға (500-ден жоғары ірі қара, 1000-нан асатын ұсақ мал) бағытталған. Бұл мақсатқа мемлекет 374 млрд теңге бөлген.
Министрдің айтуынша, бұл шаралар мал басын көбейтіп, өнім өндірісін арттыруға және импортқа тәуелділікті азайтуға мүмкіндік береді. Сонымен қатар алдағы уақытта ауыл шаруашылығының басқа бағыттары бойынша да несиелеу кеңейтіледі.
