Шетелден сапарлап келе жатқан азаматтар үшін шекарадан өту ережелерін алдын ала білу артық шығын мен кедергіден сақтайды. Қазақстанда жеке мақсаттағы тауарларды әкелу нормалары асып кеткен жағдайда төлемдер Еуразиялық экономикалық одақтың Кеден кодексі мен ЕЭК Кеңесінің № 107 Шешіміне сәйкес жүргізіледі, – деп хабарлайды 7-su.kz ақпараттық порталы.
ЕАЭО-ға мүше емес елдерден әкелінетін жолжүк құны немесе салмағы белгіленген шектен асса, бірыңғай мөлшерлеме қолданылады. Базалық шектер көлік түріне қарай бөлінеді: әуе көлігімен 10 000 еуроға дейін және 50 кг дейін, жер үсті көлігімен (автомобиль, пойыз, жаяу) 500 еуроға дейін және 25 кг дейін, ал халықаралық сәлемдемелерде бір жөнелтімге 200 еуроға дейін және 31 кг дейін рұқсат етіледі.
Төлем бүкіл жолжүкке емес, тек белгіленген нормадан асып кеткен құнға немесе салмаққа есептеледі. Жалпы құны немесе салмағы артса, асып кеткен құнның 30%-ы не болмаса әрбір артық килограмға кемінде 4 еуро мөлшерлемесі қолданылады. Мұнда қай есеп жоғары шықса, сол сома төленеді. Мысалы, автокөлікпен құны 800 еуро және салмағы 30 кг зат алып өтсеңіз, артық сома 300 еуро (30%-ы – 90 еуро), ал артық салмақ 5 кг (4 еуродан – 20 еуро) болады. Нәтижесінде ең жоғары мән ретінде 90 еуро төленеді.
Алкоголь өнімдері мен сыраға қатысты ереже қатаң: 18 жасқа толған әрбір жолаушыға 3 литрге дейін бажсыз әкелуге рұқсат беріледі. 3-5 литр аралығындағы әрбір литр үшін 10 еуро төленеді, ал 5 литрден жоғары мөлшерді жеке тұлғаларға әкелуге тыйым салынады, артық бөлігі кері қайтарылады немесе тәркіленеді. Темекі өнімдері бойынша 18 жастан асқан адамға 200 сигаретке, 50 сигараға немесе 250 г темекіге дейін шек қойылған. Одан асқанда жалпы мөлшерлеме есептеледі не тауар коммерциялық партия деп танылуы мүмкін. Электроника мен гаджеттер жалпы лимитке кіреді, бірақ бірдей жаңа құрылғылар көп болса (мысалы, 3 ноутбук немесе 4 смартфон), кеден оны жеке мақсатқа арналмаған топтама ретінде бағалап, толық декларациялау мен 12% ҚҚС талап етеді.
Төлем шекарадан өту кезінде «қызыл» дәлізде жолаушылар кедендік декларациясы толтырылған соң жүргізіледі. Сома еуромен есептеліп, декларация тіркелген күнгі Ұлттық банк бағамы бойынша теңгеге аударылады. Есепті өткізу пунктіндегі банк терминалдары немесе мобильді қосымшалар арқылы сол сәтте төлеп, түбіртек көрсеткеннен кейін жүк айналымға шығарылады. Мұндай айқын тәртіп шекарадағы рәсімдерді жеңілдетіп, сапар кезіндегі тәртіп пен заңдылықты сақтауға көмектеседі.






