ҚР ҰҚК Шекара қызметі Жетісу облысы бойынша департаменті «Қорғас» шекаралық бақылау басқармасының ұйымдастыруымен «Нұр жолы» өткізу пункті аумағында Ы. Алтынсарин атындағы орта мектептің оқушылары үшін арнайы таныстыру экскурсиясы өтті. Іс-шара жасөспірімдердің отансүйгіштік сезімін оятуға және шекарашы мамандығының қыр-сырын көрсетуге бағытталды, – деп хабарлайды 7-su.kz ақпараттық порталы.
Экскурсия барысында мектептің профориентологы Елдана мен әдеп-құқық менторы Айдана Бейсенғалиқызының жетекшілігімен келген оқушылар Шекара қызметінің күнделікті тыныс-тіршілігімен жақыннан танысты. Мектеп оқушыларына шекаралық бақылау үдерістері, заманауи техникалық құралдардың жұмыс істеу принципі және мемлекеттік шекараны күзетудегі қызметтік міндеттер туралы толық ақпарат берілді. Оқушылар шекара бекетіндегі қатаң тәртіп пен жауапкершілікті өз көздерімен көріп, мамандардың жұмысына үлкен қызығушылық танытты.
Сонымен қатар, іс-шара аясында болашақ түлектермен шекарашы мамандығының ерекшеліктері туралы мазмұнды әңгіме жүргізілді. Оларды болашақта еліміздің қауіпсіздігін қорғау саласында қызмет атқаруға шақыру бағытында кәсіби бағдар беру жұмыстары жүзеге асырылды. Шекарашылар өз кезегінде әскери оқу орындарына түсу тәртібі мен шекара қызметіндегі мансаптық мүмкіндіктер жайлы сұрақтарға жауап берді. Мұндай танымдық кездесулер жастардың кәсіби таңдау жасауына және мемлекеттік шекараның маңыздылығын терең түсінуіне септігін тигізеді.
