Әкімшілік қысым көрсету, мемлекеттік қолдау шараларынан бас тарту және заңнама нормаларын қолдану мәселелері облыстық кәсіпкерлер палатасы жанындағы кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес отырысында қаралды.
Осындай өтініштердің бірі 2018 жылдан бері мемлекеттік тапсырыс аясында мектепке дейінгі білім беру саласында қызмет етіп келе жатқан Алакөл ауданы Қабанбай ауылындағы «Ақтілек бөбекжайы» ЖШС-нің өтініші болды. Бизнес субъектісінің мәліметінше, соңғы айларда балабақша мемлекеттік органдар тарапынан бірнеше рет тексерілген. Бұл тексерулер аталмыш серіктестік орналасқан елді мекенде тұрмайтын жеке тұлғаның арызы бойынша жүргізілген.
Қарсы тарап шындыққа сәйкес келмейтін мәліметтерді әлеуметтік желілерге де таратқан. Атап айтқанда, Instagram пайдаланушыларын «Ақтілек бөбекжайы» ЖШС қызметін уәкілетті органдардың рұқсат құжаттарынсыз жүзеге асыратындығы, мектепке дейінгі ұйым аумағында ойын алаңының жоқтығы туралы құлақтандырған.
– Өтініш берушінің ешқандай дәлелі жоқ. Алайда оның іс-әрекеті мектепке дейінгі ұйымның іскерлік беделіне нұқсан келтірді, – дейді «Ақтілек бөбекжайы» ЖШС жетекшісі Қаламқас Жантеева.
Спикердің айтуынша, жеке тұлғаның «шабуылынан» кейін мемлекеттік органдар тарапынан бақылау күшейтілген. Бұл балабақшаның күнделікті жұмысына қолайсыздық тудырып отырған көрінеді. Сондай-ақ, ол мектепке дейінгі ұйым мемлекеттік білім беру тапсырысы шарты бұзылғанға дейін қаржылық және моральдық шығындарға ұшырағанын атап өтті. Осы мәселені қарау қорытындысы негізінде кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес қалыптасқан жағдайды бизнеске жүйелі қысым ретінде белгілей отырып, жүргізілген тексерулердің заңдылығына құқықтық баға алу үшін прокуратура органдарына өтініш жіберу ұсынылды.
Бұдан бөлек, кәсіпкерлік субъектісінің қызметіне қатысы жоқ үшінші тұлғалардың өтініші негізінде тексерулерге бастамашылық жасауға байланысты жүйелі бұзушылық белгілерінің болуына баса назар аудара отырып, «Атамекен» ҰКП кәсіпкерлердің құқықтарын қорғау жөніндегі кеңес хатшылығына ақпарат дайындап, жіберу туралы шешім қабылданды. «Өсімпұлдар мен айыппұлдар сомасын есептен шығару ережесін бекіту туралы» ҚР Қаржы министрінің 2026 жылғы 13 ақпандағы №13 бұйрығының нормаларын қолдану мәселелерімен «AlakolPlant» ЖШС жүгінді. Микробизнес санатына жататын кәсіпорын 2023 жылғы салық берешегін белгіленген кезеңде толық өтеді. Алайда, өсімпұлдар мен айыппұлдарды есептен шығару тетігін қолдану кезінде әртүрлі көзқарас пайда болып, есептеулер 2026 жылы жүйеде көрсетілген, бұл ережелер талаптарына іс жүзінде сәйкес болғанына қарамастан, оларды есептен шығару мүмкіндігіне күмән келтірілді. Мәселені қарау қорытындысына сәйкес кәсіпкерге бөліп төлеу түрінде реттеу нұсқасы ұсынылды, оны серіктестік ұйымдастырды.
Тағы бір өтініш «Қоржымбаев» шаруа қожалығынан келіп түсті. Шаруашылық жетекшісі «ҚазАгроҚаржы» АҚ арқылы түрік өндірісінің халықаралық қопсытқышын лизингке сатып алғанын, кейіннен ауыл шаруашылығы басқармасына инвестициялық субсидия алуға өтінім бергенін хабарлады. Алайда, жеткізушінің жеткізу мерзімін сақтамауы себебінен мемлекеттік қолдау көрсетуден бас тартылды, кәсіпкердің пікірінше, бұл оның іс-әрекетіне байланысты емес. Кеңес қорытындысы бойынша уәкілетті органдарға тиісті ұсынымдар берілді.
Айгүл БАЙБОСЫНОВА
