Қазақстанда тұтынушылық несиелер мен танымал бөліп төлеу (BNPL) қызметтеріне қатысты бақылау шараларын күшейту жоспарланып отыр. Қаржы нарығын реттеу және дамыту агенттігінің төрағасы Мәдина Әбілқасымова алдағы уақытта енгізілетін шектеулер мен заңнамалық өзгерістер туралы маңызды мәлімдеме жасады, – деп хабарлайды 7-su.kz ақпараттық порталы Arasha.kz сайтына сілтеме жасап.
Агенттік басшысының айтуынша, билік маркетплейстер мен ірі сауда үйлері ұсынатын бөліп төлеу қызметтерін заң деңгейінде реттеуді мақсат етіп отыр. Қазіргі таңда BNPL нарығын бақылауға алу үшін жаңа заң жобасын әзірлеу немесе қолданыстағы құқықтық актілерге түзетулер енгізу мәселесі қарастырылуда.
«Бұл шаралар қаржы ұйымдарына жатпайтын, бірақ несиелік өнімнің барлық белгілері бар бөліп төлеу қызметтеріне қатысты қолданылады», – деп нақтылады Мәдина Әбілқасымова.
Сонымен қатар, Қазақстан Ұлттық Банкі 2027 жылдың 1 қаңтарынан бастап қарыз алушылардың жалпы берешек көлеміне қатысты абсолютті шектеу енгізуді жоспарлап отыр. Жаңа ережеге сәйкес, әрбір азаматтың барлық несиелері мен қарыздарының жалпы сомасына нақты лимит белгіленеді. Мұндай қадам халықтың шамадан тыс қарызға батуының алдын алуға және қаржылық тұрақтылықты нығайтуға бағытталған.
Реттеуші орган маркетплейстер арқылы ұсынылатын бөліп төлеу қызметтері іс жүзінде банктік несиелерден еш айырмашылығы жоқ екенін алға тартады. Осыған байланысты мұндай қаржылық өнімдерге пайыздық мөлшерлемелерді шектеу және тұтынушылардың құқықтарын қорғауға бағытталған қатаң нормалар енгізілмек. Жаңа талаптар тек банктерге ғана емес, сонымен қатар осы уақытқа дейін толыққанды банктік бақылаудан тыс қалып келген финтех және телекоммуникация компанияларының қызметіне де тікелей әсер етеді. Ендігі кезекте кез келген бөліп төлеу қызметі мемлекеттің жіті қадағалауында болады.
