Қазақстандық спортшы Айым Серікбаева (-44 кг) таеквондодан (WT) жастар арасында әлем чемпионы атанып, ел спортының тарихына жаңа бет қосты. Өзбекстан астанасы Ташкент қаласында өтіп жатқан әлем біріншілігінің шешуші кезеңінде ол мексикалық Понсе Нуньес Дара Ширлимен кездесті. Тартысты өткен финалда отандасымыз қарсыласын 2-0 есебімен сенімді түрде жеңіп, алтын тұғырдан көрінді, – деп хабарлайды 7-su.kz ақпараттық порталы.
Айымның жеңісі – отандық таеквондо мектебі үшін айтулы әрі тарихи сәт. Ел құрамасы жастар арасындағы әлем чемпионатында соңғы рет алтын жүлдені 2006 жылы иеленген болатын. Осылайша, араға 20 жыл салып әлемдік доданың ең биік марапаты қайтадан ел қоржынына түсті. Жас спортшының мұндай жоғары нәтиже көрсетуі қазақстандық таеквондоның халықаралық деңгейдегі бәсекеге қабілеттілігін тағы бір мәрте дәлелдеп отыр.
Айым Серікбаева бұған дейін де халықаралық аренада өзін жақсы қырынан танытқан спортшы. Ол Азия чемпионы атағын иеленіп, жастар арасындағы Азия ойындарының жеңімпазы болған еді. Сондықтан оның әлемдік додадағы жеңісі кездейсоқтық емес, ұзақ жылғы еңбек пен дайындықтың жемісі.
Қазіргі таңда Ташкенттегі әлемдік біріншілікте Қазақстан құрамасы сәтті өнер көрсетуде. Айымның алтын медаліне дейін ел қоржынына Ерасыл Ерзат пен Ислам Медетбай жеңіп алған екі қола жүлде түскен болатын. Жер-жаһанның мықтылары жиналған жастар арасындағы әлем чемпионаты 17 сәуірге дейін жалғасады. Жанкүйерлер алдағы күндері де отандастарымыздан жаңа жеңістер мен жарқын сәттер күтуде.
