Жетісу облысының әкімі Бейбіт Исабаев волейболдан әйелдер командалары арасында Астанада өткен ел чемпионатының 34-ші маусымының финалдық кезеңінде жеңіске жеткен «Жетісу» командасының қыздарын қабылдап, өз кезегінде алғыс айтты. «Жетісу» волейбол клубы өз тарихында Қазақстан чемпионатын 10-шы мәрте жеңіп отыр. Ал ел суперкубогын 5 мәрте, Қазақстан кубогын 9 рет ұтты. Былтыр Филиппинде өткен 1-ші Азия чемпиондар лигасында топжарды. Оған дейін Азия чемпионатында күміс (2013) пен қола (2011) медаль алған еді.
– Айтулы жеңіспен баршаңызды құттықтаймын! Биыл «Жетісу» волейбол клубының құрылғанына 25 жыл болады, соған орай ерекше сый болды. Әр ойынды жіті бақылап отырдым. Бұл жеңіске бас бапкерден бастап команданың әр мүшесі молынан еңбек сіңірді. Жетісу өңірінде волейболдың дәстүрі қалыптасқан, ал біз сол бағыттан ажырамауымыз қажет , – деді өз сөзінде Бейбіт Исабаев.
Одан бөлек облыс басшысы мерейлі датаға орай арнайы документалды фильм түсіріп, еліміздегі тұңғыш әзірге жалғыз волейбол базасының бір бұрышын музейге айналдыру жөнінде сөз қозғады.
«Жетісу» волейбол клубы биылғы чемпионатта тек бір ойын (5-үлкен турда «Қуаныштан» 1:3 есебімен) жеңіліп, қалған турдағы барлық кездесуді жеңді. Ел суперкубогы үшін болған ойында «Тұранды» ұтты. Азия аймағының атынан Бразилияда өткен клубтар арасындағы Әлем чемпионатына қатысты. Маусымның қорытындысы бойынша чемпионатта «Жетісу» командасынан Мария Фролова «MVP» (ең сапалы ойыншы), Дарья Шаргородская «Үздік байланыстырушы», Валерия Якутина «Үздік тосқауыл қоюшы» және Мяо Ивэн «Үздік шабуылшы» болды.
– Бүгінде спортта нәтиже кездейсоқ болмайды. Бұл жүйелі әрі тұрақты еңбектің жемісі. Бұл титул – командамыздың ғана емес, ортақ еңбектің нәтижесі. Ойыншыларымыз мауысм бойы мінез танытып, жоғары деңгейде ойын көрсетті, – деді «Жетісу» волейбол клубының бас бапкері Марко Гршич.
Плей-офф кезеңінде команданың капитаны есебінде алаңға шыққан тәжірибелі ойыншы, Ресей құрамасында ойнаған, осыған дейін Суперлигадағы (Ресей) үздіктердің бірі болған Мария Фролова:
– Осы уақытқа дейін көптеген командаларды көріп, байқап жүрміз, бірақ дәл осылай ойыншыларға жағдайын жасап отырған клубтар өте сирек. Осы тұрғыда «Жетісудың» бағыты дұрыс. Барлық жағдай қарастырылған, біз тек ойнап, медаль алуымыз керек, – деді.
«Жетісу» волейбол клубы үшін маусым аяқталған жоқ. Бір аптадан кейін (24-30 сәуір) Тайландта болатын 2-ші Азия чемпиондар лигасына қатысады. Қарсыласы – «Beijing Artctic Ocean» (Қытай). Бұл жолғы турнирдің ережесі өзгеше. Командалар (8 команда) ширек финалдан бастайды, жеңілсе жарысты сол жерден аяқтайды.
Серік ҚАНТАЙ
