«Хан Тәңірі» футбол клубының өкілдері арнайы тексеріс кезінде УЕФА-ның «С» санатындағы жаттықтырушыға берілетін лицензиясын растау кезінде жалған құжаттар пайдаланғаны белгілі болды. Қазақстан футбол федерациясының бақылау, тәртіп және әдеп комитетінің (БТӘК) отырысында команданың мәселесі қаралып, тиісті шара қолданылды, – деп хабарлайды 7-su.kz ақпараттық порталы.
Бақылау, тәртіп және әдеп комитеті материалдарды қарау кезінде Қазақстан футбол федерациясының ережесіне қайшы іс-әрекет жасап, қызметтік тексеріске кедергі келтіріп, ынтымақтастықтан бас тартқаны үшін Тәртіптік регламенттің 61-бабы 1-тармағына сәйкес тиісті шаралар қабылданды.
«Хан Тәңірі» футбол клубына 50 АЕК көлемінде айыппұл салынды. Ол 14 мамырға дейін төленуі тиі. Қосымша клуб ҚФФ жарыстар қауіпсіздігі және интегрити қызметіне сұратылған құжаттар мен жазбаша түсініктемелерді белгіленген мерзімге дейін жіберуге міндеттелді.
Бұл шешім орындалмаса, Бірінші лигада ойнайтын клубқа қосымша санкциялар, оның ішінде ұпайдан айыру, төменгі дивизионға түсіру, сондай-ақ жауапты тұлғаларға футбол қызметімен айналысуға тыйым салу шаралары қолданылуы мүмкін.
