Тайланд астанасы Бангкок қаласында 26-30 сәуір аралығында өтетін 2-ші Азия чемпиондар лигасына қатысатын «Жетісу» волейбол клубы жарыс алдындағы соңғы оқу-жаттығу жиынын Талдықорғанда өткізді. Команда бүгін түнде Алматы арқылы Бангкокқа ұшады.
Жаңа маусым қарсаңында клуб құрамында бірқатар өзгерістер орын алды. Өткен маусымда «Қуаныш» сапында өнер көрсеткен орталық тосқауыл қоюшы Полина Уфимцева мен Алина Әлімбекова «Жетісу» құрамын толықтырды.
Ал команда капитаны Кристина Аниконова плей-офф кезеңінде алған жарақатына байланысты алдағы халықаралық турнирге қатыспайды. Сондай-ақ, жарақатынан енді ғана айығып қатарға қосылған Ольга Хадижогло мен жас ойыншы Елизавета Сырова да бұл жолғы Азия чемпиондар лигасының құрамынан тыс қалды.
Айта кетейік, «Жетісу» волейбол клубы өткен жылы Филиппинде өткен алғашқы Азия чемпиондар лигасында чемпион атанған болатын. Сол жарыста Карина Денисова «Ең үздік ойыншы» (MVP) атағын иеленсе, Валерия Якутина «Үздік тосқауыл қоюшы», ал Дарья Шаргородская «Үздік байланыстырушы» аталымдарында марапатталған еді.
Биыл да команда жоғары нәтижелермен көзге түсіп отыр. «Жетісу» өткен аптада Астанада өткен ел чемпионатының 34-маусымында топ жарып, клуб тарихындағы 10-шы чемпиондық атағын жеңіп алды.
Клубтың құрылғанына биыл 25 жыл толады.
Аяулым Шынгаева
