Желтоқсан көтерілісінің 40 жылдығына орай кәмелетке толмағандарды бейімдеу орталығы аумағында 40 түп жеміс ағашы отырғызылды. Бастама елдік рухты көтеру мен экологиялық мәдениетті қалыптастырудың жарқын үлгісіне айналды. Салтанатты жиын патриоттық әндермен басталып, жиналған көпшілікке рух сыйлады. Шараға қоғам қайраткерлері, Желтоқсан көтерілісінің куәгерлері, зиялы қауым өкілдері мен мекеме қызметкерлері қатысты.
Басқосу «Адал азамат» бағдарламасы аясында ұйымдастырылды. Бұл жас ұрпақты отансүйгіштікке тәрбиелеумен қатар туған жерді, табиғатты аялауға үндейтін игі қадам. Салтанатты сөз алғандар бастаманың маңыздылығын айтып, Желтоқсан көтерілісінің Тәуелсіздік алудағы маңызына тоқталды.
Шара барысында белгілі публицист-жазушы Көлбай Адырбек-ұлы сөз сөйлеп, Желтоқсан оқиғасының тарихи маңызын тілге тиек етті. Ол өз еңбектерінде көтерілістің ақиқатын ашуға мән бергенін атап өтті. Сонымен қатар, Желтоқсан көтерілісіне қатысушы Түгелбай Тәшенов, «Желтоқсан – 1986» көптомдық еңбектің авторы Талғат Айтбайұлы да Желтоқсан оқиғасы кезінде бастан өткізген жайттармен бөлісті. Олар ел тәуелсіздігі жолында құрбан болған ерлердің ерлігі ешқашан ұмытылмайтынын, бүгінгі ұрпақ солардай ержүрек болу керегін жеткізді.
Жиында орталық директоры Ерлан Сансызбаев сөз алып, тәрбиелік шаралардың жасөспірімдер үшін маңызы зор екенін атап өтті. Ол ел мүддесі үшін ұйымшылдық пен бірліктің үлгісін көрсеткен Желтоқсаншыларға алғыс білдірді.
Шара аясында көтеріліске қатысқан Түгелбай Тәшенов, Жамбылбек Тайжұмаев, Қайыргелді Күзембаев, Талғат Айтбайұлы, Көлбай Адырбекұлы, Ақбөпе Балғымбекова, Ыдырыс Аяп және Ақкүміс Ихласовалар Талдықорған қаласы әкімінің Алғыс хатымен марапатталды.
Салтанатты бөлімнен кейін қатысушылар мекеме ауласына 40 түп жеміс ағашын отырғызды. Бұл игі іс табиғатты көркейту ғана емес, өткен тарихқа тағзым жасап, болашақ ұрпаққа өнеге көрсетудің көрінісі. Мұндай тағылымды шаралар жастардың бойына отансүйгіштік сезім қалыптастырып, туған жерге деген сүйіспеншіліктерін арттыра түсері сөзсіз. Желтоқсан рухы – ел жадында мәңгі сақталып, ұрпақтан ұрпаққа жалғаса бермек.
Гүлжан ТҰРСЫН
