«Жетісу» волейбол клубы Бангкокқа (Тайланд) жетті. Жетісулық қыздарды Суварнабхуми (аудармасы – алтын жер) әуежайынан арнайы жанкүйерлер күтіп алып, құрмет көрсетті. Тай елінің астанасында 26-30 сәуір аралығында 2-ші Азия чемпиондар лигасы өтеді. Ел чемпиондарының қарсыласы – «Beijing Artctic Ocean» (Қытай).
Алматыдан 23 сәуірге қараған түні (00:30) ұшқан «Air Astana» ұшағы Қазақстан уақытымен таңертең 07:00-де (Бангкок уақытымен 09:00) жетті. Ойыншыларды ұйымдастырушылар жылы қарсы алды. Одан бөлек волейболшыларымызды арнайы жанкүйерлер іздеп келіп, сый-сияпатын ұсынып, Қазақстан туын алғандарын, ойынға арнайы келетіндіктерін айтты.
– Шыны керек, әуежайға дейін жанкүйерлер іздеп келіп, сыйлық ұсынады деп күтпедік. Әрине, қуаныштымыз. Ал жарысқа келетін болсақ, команда тас-түйін дайын. Жеңіс үшін барымызды саламыз, – дейді «Жетісу» волейбол клубының ойыншысы Кристина Белова.
Ел волейболы жөнінде жазып, ойындарды талдап, волейболшылардың ауыс-түйісін бірінші болып хабарлайтын Inside volleyball өзінің телеграмдағы парақшасында:
«Бұл құрметтен түсінгеніміз: «Жетісу» волейбол клубы әлемдік аренада өз орныны қалыптастырып, брендке айналып келеді. Командаға деген қызығушылық артып келе жатқанының көрінісі», – деп жазды.
Бұл жолғы турнирдің ережесі өзгеше. Командалар (8 команда) ширек финалдан бастайды, жеңілсе жарысты сол жерден аяқтайды. «Жетісу» 26 сәуірде астана уақытымен 13:00-де ойнайды (Бангкок уақыты бойынша 15:00).
Еске салайық, былтыр Филиппинде өткен 1-ші Азия чемпиондар лигасында «Жетісу» волейбол клубы жеңіске жеткен болатын.
Серік ҚАНТАЙ
арнайы Тайландтан
