Соңғы бес жылда Қазақстанда ана өлімі 35%-ға төмендеді. Бұл туралы Денсаулық сақтау министрі Ақмарал Әлназарова Астанада өткен Орталық Азия елдеріндегі әйелдер мен жастар денсаулығына климаттық және экологиялық қауіптердің әсеріне арналған халықаралық сессияда мәлімдеді, – деп хабарлайды 7-su.kz ақпараттық порталы.
Министрліктің мәліметінше, елде ана мен бала денсаулығына қатысты негізгі көрсеткіштер айтарлықтай жақсарған. Атап айтқанда, нәресте және перинаталдық өлім деңгейі де төмендеген. Мұндай нәтижелер денсаулық сақтау саласында жүргізілген жүйелі реформалар мен медициналық көмектің заманауи стандарттарын енгізудің арқасында мүмкін болған.
Сонымен қатар, ведомство басшысы климат өзгерісінің адам денсаулығына әсері күшейіп келе жатқанын атап өтті. Оның айтуынша, ауа температурасының көтерілуі мен экологиялық факторлардың нашарлауы инфекциялық және жүрек-қантамыр ауруларының қаупін арттырады. Бұл, өз кезегінде, әйелдердің репродуктивтік денсаулығына да кері әсер етуі ықтимал.
Қазақстанда жүкті әйелдерді ерте кезеңде медициналық бақылауға алу шаралары күшейтілген. Қазіргі таңда жүкті әйелдердің 90%-дан астамы жүктіліктің алғашқы 12 аптасында есепке алынады. Сонымен бірге «Аналар саулығы» бағдарламасы аясында алғашқы медициналық-санитариялық көмек көрсету деңгейінде және өңірлік перинаталдық орталықтарда әйелдер консультацияларының жұмысы жандандырылған.
Бұдан бөлек, елде «Бір күндік клиника» жобасы жүзеге асырылып жатыр. Бұл жоба туа біткен даму кемістіктері мен хромосомалық патологияларды ерте анықтауға мүмкіндік береді.
Жастар арасында да алдын алу және түсіндіру жұмыстары күшейтілген. Республика бойынша жұмыс істейтін жастар денсаулық орталықтары репродуктивтік және психикалық денсаулық мәселелері бойынша кеңес беріп келеді.
