Волейболдан әйелдер командасы арасында Бангкокта (Тайланд) 26-30 сәуір аралығында өтетін 2-ші Азия чемпиондар лигасына қатысатын «Жетісу» командасы Тай астанасындағы алғашқы жаттығуын өткізді.
Сары құрлықтың үздік 8 командасы жиналған турнирдің басталар сәті жақын. Барлық команда Бангкокқа келді. Былтыр Филиппинде өткен 1-ші Азия чемпиондар лигасында жеңіске жеткен «Жетісу» командасы осы жолы өз чемпиондығын қорғап қалу үшін ойнайды.
– Ерте келгеніміздің пайдасы климат жағына, уақыт тұрғысына қалыптасу үшін жақсы деп ойлаймын. Бүгін алғашқы жаттығуды өткіздік. Бәрі ойдағыдай. Турнирге келетін болсақ, маған «нокаут» жүйесі ұнамады. Бірінші ойында жеңілген команда үйіне қайтады, ал жеңіп жатса жартылай финалға шығады. Қарсыласымыз Қытайдың өте мықты командаларының бірі. Екі легионер ойнайды. Қарсыласты барынша зерттеп жатырмыз. Мен өз командама сенемін. Жеңіс үшін барымызды саламыз, – дейді команданың бас бапкері Марко Гршич.
«Жетісу» 26 сәуірде астана уақытымен 13:00-де ойнайды (Бангкок уақыты бойынша 15:00). Қарсыласы – «Beijing Artctic Ocean» (Қытай).
Серік ҚАНТАЙ
арнайы Тайландтан
