Бангкокта (Тайланд) волейболдан өтіп жатқан әйелдер командалары арасындағы 2-ші Азия чемпиондар лигасын «Жетісу» жеңіспен бастады. Жаңа ережеге сәйкес, алғашқы ойында жеңілген команда бірден үйіне қайтып, жеңгені жартылай финалға өтеді. Ел чемпиондары «БАО» («Beijing Artctic Ocean», Қытай) командасын 3:2 (25:16, 22:25, 23:25, 25:17, 15:13) есебімен жеңді.
– Әуелі жанкүйерлерімізді жеңіспен құттықтаймын. Бұл Қытайдағы үздік командалардың бірі. Ойын өте тартысты өтті. Қысымға қарамастан 1:2 есебімен жеңіліп жатып, жеңісті жұлып алдық. Соңғы шешуші 5-ші сет нағыз «триллер» болды. Ойыншыларымыз барынша тырысты. Қателіктер жоқ емес, алдағы 2 күнде содан барынша қорытынды шығарамыз. Менің болжамым бойынша біздің жартылай финалдағы қарсыласымыз жапониялықтар болатын шығар, – деді ойыннан кейін «Жетісу» волейбол клубының бас бапкері Марко Гршич.
Ұйымдастырушылардың тарапынан матчтың үздік ойыншысы «Жетісу» волейбол клубының байланыстырушысы Дарья Шаргородская болды. Ал ең нәтижелі ойыншы – Мяо Ивэн. Ол 22 ұпай жинады (20 шабуыл, 1 эйс, 1 тосқауыл).
«Жетісудың» жартылай финалдағы қарсыласы ертеңгі болатын «NEC Red Rockets Kawasaki» (Жапония) мен «Harudot Chonburi RMUTT» (Тайланд) арасындағы кездесудің жеңімпазы болады.
Серік ҚАНТАЙ
арнайы Тайландтан
