Бангкокта (Тайланд) волейболдан әйелдер командалары арасында өтіп жатқан 2-ші Азия чемпиондар лигасының жартылай финалында «Жетісу» командасы «NEC Red Rockets Kawasaki» (Жапония) командасынан 1:3 (18:25, 20:25, 26:24, 22:25) есебімен жеңілді. Ел чемпиондары енді ертең қола медаль үшін ойнайды.
– Бір сетте үш-төрт қателіктен жібердік. Бұл әрине, өте көп. Ал қателіксіз ойнауға тырысатын, аса дәлдікпен жүйелейтін команда үшін ол оңай олжа. Қиын ойын болатынын о баста білдік. Көргендеріңіздей 3-сетте ойынды өз қолымызға алғанымызбен, 4-сетте уыстан шығарып алдық. Егер командамыз өз ойынын ойнағанда, біз бүгінгі кездесуде мүлдем бөлек нәтиже тіркейтін едік. Өкінішке қарай, солай болды. Жапониялық ұжым лайықты түрде жеңіске жетті. Енді ертең бізді 3-орын үшін болатын ойын күтіп тұр, – деді «Жетісу» волейбол клубының бас бапкері Марко Гршич.
Жапониялық командамен болған ойында жетісулықтардан Татьяна Никитина үздік нәтиже көрсетті. Ол 19 ұпай (15 шабуыл, 4 тосқауыл) жинады. Одан кейін Наталья Борисенконың (13 ұпай – 9 шабуыл, 4 тосқауыл) көрсеткіші жақсы. Ал жалпы ойындағы нәтижелі ойыншы – Есино Сато. Жапониялық ойыншы 23 ұпай (19 шабуыл, 2 тосқауыл, 2 эйс) алды.
Есино Сато:
– Иә, бүгінгі ойында, күткеніміздей, қарсылас команданың тосқауылымен шабуылының биіктігіне байланысты бізге біршама қиын болды. Дегенмен, біз өзімізге тән жапондық қорғанысты және командамыздың шабуылын толық көрсете алдық. Жеңіске жеткенімізге өте қуаныштымын. Сондай-ақ, менің ойымша, қарсылас сапындағы ең үздік ойыншы — 27-нөмірлі орталық тосқауыл қоюшы (ред. Наталья Борисенко). Оның жасаған шабуылдары бізге көп қиындық тудырды. Жалпы, өте қызықты ойын өтті деп ойлаймын, – дейді.
Енді «Жетісу» командасы 3-орын үшін болатын кездесуді 30 сәуір, 13:00-де (Қазақстан уақытымен) «Суприм» және «Накхонратчасима» (екеуіде Тайланд) жеңілгенімен ойнайды.
