Талдықорған қаласында Десанттық-шабуылдаушылар арасында әскери жекпе-жек ұрысы бойынша чемпионат өтті. Аталған жарыс жыл сайын әскери қызметшілердің физикалық дайындығын жетілдіру, жауынгерлік рухын нығайту және кәсіби шеберлігін арттыру мақсатында ұйымдастырылады.
Чемпионат Қазақстан Қарулы Күштері арасында маусым айында өтетін республикалық додаға іріктеу кезеңі десек, мұнда топ жарған үздік спортшылар ел біріншілігінде бақ сынайды.
Доданың ашылуында Жетісу гарнизонының бастығы полковник Алмас Төлегенов сөз сөйлеп, жарысқа қатысушыларға сәттілік тіледі. Ол өз сөзінде мұндай жарыстар әскери қызметшілердің жауынгерлік қабілетін арттырудағы ерекше маңызға ие екенін атап өтті.
Екі күнге созылған тартысты бәсекеге Алматы, Қонаев және Жетісу гарнизонынан 70-ке жуық әскери спортшы қатысты. Қатысушылар жоғары дайындық деңгейін көрсетіп, әр салмақта өзара мықтыны анықтады.
Жарыс қорытындысы бойынша лейтенант Айдын Нуридинов (60 келі), кіші сержант Данияр Мәулетханов (65 келі), ефрейтор Диас Давлятов (70 келі), лейтенант Тамерлан Кабрахманов (75 келі), ефрейтор Дархан Дабылбек (80 келі), қатардағыжауынгер Нұрғазы Шыңғазы (85 келі), ефрейтор Жақсыбек Аймаханов (90 келі), аға сержант Мейржан Қожантаев (+90 келі) жеңімпаз атанды.
Жалпы командалық есепте бірінші орынды 18404 әскери бөлімі, екінші орынды 61993 әскери бөлімі, ал үшінші орынды 48386 әскери бөлімі жеңіп алды.
Жеңімпаз спортшылар медаль, грамота және арнайы чемпиондық белбеумен марапатталды. Ұйымдастырушылардың айтуынша, чемпионат жоғары деңгейде өтіп, қатысушылар арасында нағыз бәсекелестік пен достық рух қалыптасты.Аталған дода әскери спортты дамытуға, әскери қызметшілердің кәсіби және дене дайындығын шыңдауға елеулі үлес қосады.
Жетісу гарнизонының баспасөз қызметі
