Жетісу облысында адам өліміне әкеп соққан ірі жол-көлік оқиғасына қатысты сот процесі аяқталды. Талдықорған мен Текелі қалаларын жалғайтын тас жолда төрт автокөліктің соқтығысуына себепкер болған жүргізушіге қатысты жаза кесілді, – деп хабарлайды 7-su.kz ақпараттық порталы.
Оқиға 2026 жылдың 31 қаңтарында орын алған еді. Ескелді аудандық сотының мәліметінше, «Mercedes-Benz 230» тізгіндеген азамат техникалық ақауы бар көлікпен жолға шыққан. Ол басып озу маневрін жасау кезінде жол ережесін өрескел бұзып, оң жақ жиекке шығып кеткен. Қайтадан өз жолағына оралуға тырысқан сәтте «Nissan Cefiro» көлігімен соқтығысқан. Соққы салдарынан «Nissan» қарсы бағытқа ұшып шығып, онда келе жатқан «HONGQI E-QM5» маркалы темір тұлпарға соғылған. Тізбекті апат мұнымен тоқтамай, «HONGQI» көлігінің артында келе жатқан «Toyota Camry» де соқтығысқа тап болған.
Өкінішке қарай, «Nissan Cefiro» жүргізушісі алған ауыр жарақаттарынан ауруханада көз жұмды. Жол апатының өзге қатысушылары түрлі дәрежедегі дене жарақаттарын алды. Сот отырысында айыпталушы ҚР Қылмыстық кодексінің 345-бабы, 3-бөлігі бойынша кінәлі деп танылды. Жеңілдететін мән-жайларды ескере отырып, сот оны 2 жыл 6 айға бас бостандығынан айыру туралы шешім шығарды. Сонымен қатар ол алдағы 5 жыл бойы көлік басқару құқығынан айырылды.
Материалдық және моральдық шығындарды өтеу мәселесі де сот назарынан тыс қалған жоқ. Жәбірленуші тараптың талап-арызы ішінара қанағаттандырылып, сотталған азаматтан 3 млн 129 мың теңге материалдық зиян және 10 млн теңге моральдық өтемақы өндірілетін болды. Қазіргі уақытта сот үкімі заңды күшіне енген жоқ. Айта кетерлігі, жол ережесін сақтау – тек айыппұлдан құтылу емес, өзіңіздің және өзгенің өмірін сақтаудың жалғыз кепілі.
Посмотреть эту публикацию в Instagram
